Koalicioni EuroAtlantik, i regjistruar tashmë si subjekt garues në zgjedhjet e 11 maj 2025, me kryetar Endri Hasa, thuajse ka përfunduar përcaktimin e listave të kandidatëve në 12 qarqet e vendit.
Në qarkun e Shkodrës, kjo forcë politike e cila realisht udhëhiqet nga Lulzim Basha, futet me një listë me emra mjaft të njohur, pjesë e strukturave drejtuese të PD- së në kohën që kjo forcë udhëhiqej nga Basha.
ShkodraWeb ka mësuar se emrat më të mundshëm për të qenë kandidatë zyrtare të Koalicionit Euroatlantik në në qarkun e Shkodrës, janë: Xhevdet Amuli, Anton Kokaj, Ramiz Çoba, Arben Gjuraj, Valbona Quku, Aldo Gega, Steisi Çokaj, Franc Shkami. Ofertë për të qenë pjesë e listës i është bërë edhe Fatlum Nurjes por sipas informacioneve jo zyrtare, ai ka refuzuar përfshirjen në garë.
Renditja e këtyre emrave në listën e qarkut Shkodër, nuk ka ndonjë rëndësi të madhe teksa të gjithë kandidatët paraprakisht kanë rënë dakort se, nëse Koalicioni EuroAtlantik siguron vota për një mandat, kandidati që ka marrë më shumë vota nominale, do ta gëzojë atë.
Ligjërisht, kjo marrëveshje, qoftë edhe para noterit, nuk merret parasysh nga KQZ, duke qenë më shumë një marrëveshje xhentelmenësh mes kandidatëve. /ShkodraWeb/
