Mbrëmjen e të shtunës është mbyllur procesi i propozimit të kandidaturave për kryetarë bashkie dhe deputetë, nga baza e PD, dega Shkodër. Nje proces i mirëpritur nga baza por edhe nga qytetarët pasi hap një fazë të re në mënyrën dhe mundësinë e gjithësecilit për t’u shprehur dhe për të propozuar personin të cilin ai e sheh si perfaqësues politik.
Gjithashtu kjo fazë ndez motorët e fushatës për partinë më të madhe të opozitës. Është vënë re se në të gjitha grupseksionet e Degës Shkodër, ka patur një pjesmarrje të madhe të anëtarëve. Emrat të cilet kanë kryesuar listën janë: Voltana Ademi, Arben Lushaj, Greta Bardeli, Jozefina Topalli, Xhemal Bushati, Lorenc Luka, Bardh Spahija, Izmira Ulqinaku, Romeo Gurakuqi, Nesti Kiri, Irena Shestani, Helidon Bushati etj.
Lista përbëhet nga emra të njohur dhe me kontribute politike e administrative, si kryebashkiakja aktuale e Shkodrës, ish- deputetët e PD-së por edhe ish- kryetarja e Qarkut Shkodër dhe ish- kryeparlamentarja Topalli. Ne grupseksione janë propozuar edhe emrat e kryetarit dhe sekretarit të kesaj dege por meqë nuk janë dorëhequr sipas Udhëzimit 60 te PDSH-së, nuk janë në këtë listë. /ShkodraWeb Media/
