Hetimet e policisë për vrasjen e Pjetër Gjoka (Kola) në zonën e Pukës kanë çuar agjentët në gjurmët e një tjetër gruaje, e cila mësohet se është shoqëruar tanimë.
Mësohet se gruaja e shoqëruar është nga Berati dhe është ndaluar pasi mendohet se ka dijeni për rrethanat e ngjarjes.
Vrasja e 44-vjeçarit Pjetër Gjoka dyshohet se ndodhi në një magazinë në fshatin Korthpulë, pas prishjes së pazareve të drogës.
Deri tani të arrestuar për ngjarjen janë dy banorë të zonës, një grua nga Cërriku dhe e sapondaluara nga Berati.
Ndërkohë, autori i dyshuar i ngjarjes, Martin Pergjini mbetet ende në arrati. Dyshohet se në magazinën e drogës që u bë shkak për vrasjen e Gjokës më 27 shtator, punonin gra nga rrethe të ndryshme të Shqipërisë dhe ndër punonjësit e angazhuar aty ishin edhe shtetas të huaj.
Pjetër Gjoka nga fshati Ungrej i Lezhës fillimisht u dërgua nga dy persona ende të paidentifikuar në qendrën shëndetësore në Vaun e Dejës dhe më pas e braktisën aty.
Më pas nga aty u transportua në spitalin rajonal të Shkodrës për mjekim më të specializuar dhe policia njoftoi se 44-vjeçari ndërroi jetë në spital.
Njoftimi i policisë:
Shkodër/Informacion paraprak
Rreth orës 18:00, në qendrën shëndetësore të Vaut të Dejës është paraqitur për ndihmë mjekësore, shtetasi P. K., 44 vjeç, nga Lezha, i plagosur me armë zjarri, në rrethana ende të paqarta, ne fshatin Qafë Çelë, Pukë.
Ky shtetas është transportuar në Spitalin Rajonal Shkodër, për ndihmë mjekësore më të specializuar, i cili ndërroi jetë në spitalin e Shkodrës.
Është ngritur menjëherë grupi hetimor dhe nën drejtimin e Prokurorisë pranë Gjykatës së Rrethit Gjyqësor Shkodër vijon puna për zbardhjen e rrethanave të ngjarjes, identifikimin dhe kapjen e autorit/ve.
