Eksod “biblik” tek Vllaznia, 11 largime nga skuadra kuqeblu, nisin përgatitjet për sezonin e ri futbollistik…

Vllaznia zbret në fushë për herë të parë në drejtimin e trajnerit Migen Memelli dhe ndihmësit të tij, Ndriçim Shtubina, por e nis me një skuadër të përgjysmuar. Plot 11 lojtarë mund të quhen të larguar pas përfundimit të sezonit 2022- 2023 dhe nuk bëhet fjalë për emra dosido, por për titullarë që kanë mbajtur peshën kryesore në skuadër.

Në seancën e parë munguan emra si Liridon Latifi, Erdenis Gurishta, Kaina Nunjesh, Ardit Hoxhaj, Darko Bulatoviç, Dajan Shehi, Fjoart Jonuzi, Arsid Kruja, Kristjan Vulaj, Elvedin Heriç dhe Ante Aralica. Edhe pse për një pjesë të tyre nuk ka ende një konfirmim zyrtar për largimin, “Panorama Sport” mëson se nuk ka më kthim pas.

Klubi shpreson që të bindë të paktën kapitenin Gurishta ose mesfushorin Jonuzi, por ofertat që këta të fundit kanë nga skuadra të tjera, ka bërë që t’i thonë lamtumirë Vllaznisë, për më tepër që edhe kontrata iu ka skaduar. Drejtuesit nuk gjetën një marrëveshje për rinovim as me sulmuesin Ardit Hoxhaj, si dhe qendërmbrojtësit Dajan Shehi dhe Darko Bulatoviç, të cilët janë larguar përfundimisht nga skuadra.

Një pjesë të lojtarëve të larguar, klubi nuk i kishte në plane. Mes atyre që nuk pritet të vazhdojnë me Vllazninë është përfshirë edhe mesfushori shkodran, Arsid Kruja, ndërsa në dyshim mbetet mbrojtësi kroat, Marko Juriç, i cili edhe pse ka pasur bisedime për të rinovuar kontratën, fakt është që në seancën e parë nuk ka qenë i pranishëm.

Mesa duket, Vllaznia e sezonit të ri do të ketë me ndryshime të mëdha në përbërje, teksa kanë mbetur pak titullarë nga kampionati i fundit. Të gjitha këto largimet natyrisht që do të kompensohen në ditët në vijim me afrimin e disa lojtarëve, ndërsa aktualisht vetëm tre të tillë janë zyrtarizuar nga klubi si prurje të merkato së verës.

Drejtuesit kanë ndryshuar strategji këtë sezon, duke larguar një pjesë të lojtarëve me moshë të madhe dhe afruar të rinj, duke nënshkruar kontrata 3-vjeçare. Pritet që edhe buxheti i klubi të jetë më i ulët se sezoni i fundit.

Në seancën e djeshme kanë marrë pjesë 20 lojtarë, ku shumica e tyre ishin të rinj, teksa sezonin e fundit kanë luajtur me U-21.

Nga skuadra e kampionatit të fundit ishin emra si Bojan Zogoviç, Kristi Qarri, Geralb Smajli, Esin Hakaj, Esat Mala, Herald Marku, Rejan Alivoda, Lorik Boshnjaku, Mehdi Çoba, Bekim Balaj dhe tri afrimet e zyrtarizuar së fundmi: Ildi Gruda, Eslit Sala dhe Darko Dodev.

Ndërsa nga të rinjtë ishin emra si Roel Juka, Paulo Pjeshka, Flori Spahija, Klejdi Paloka, Gledian Pusi, Antonio Delaj dhe Arval Maliqi.