Edi Martini optimist per startin e Vllaznise: Te synohet vendi i 4-et, te luftohet per Kupen

Ish-futbollisti i njohur dhe ish-trajneri i Vllaznisë, Edi Martini, është shprehur me nota pozitive për startin e kuqebluve në këtë sezon futbollistik. Ai ka vlerësuar lojën e skuadrës në mesin e fushës në sfidën ndaj Lushnjës, por ka theksuar faktin se Vllaznia duhet të bëjë më shumë për të rregulluar qendrën e mbrojtjes dhe në vijën e sulmit.

“Mendoj se skuadra ka bërë një lojë të mirë në takimin me Lushnjën, një 90-minutësh ku nuk vuri në diskutim fitoren. Por, për mua kjo ndeshje nuk ishte barometri i vërtetë. Loja nuk ishte më e mira, por mendoj se në të tilla situata kanë rëndësi pikët. Pikët janë të domosdoshme dhe marrin më shumë vlerë kur merren në transfertë. Unë mendoj se kemi bërë një start të mirë këtij sezoni”, është shprehur Martini.

ANALIZA

Martini i ka bërë një analizë teknike edhe reparteve të veçanta të fushës.

“Ekipi ka shfaqur lojë të mirë në repartin e mesfushës, por në sulm e në qendër të mbrojtjes ka treguar probleme. Sulmi nuk ka shfaqur asgjë dhe ky është një shqetësim. Ndërsa mund të them se probleme ka shfaqur edhe Orelesi në qendër të mbrojtjes. Për mua ai nuk është ambientuar me pozicionin ku po aktivizohet dhe ndaj Lushnjës, problemet e tij ishin evidente. Kjo të bën shumë skeptik, pasi ekipe të tjera kanë sulmues cilësor dhe të vënë në vështirësi”, ka vazhduar ish-trajneri.

OBJEKTIVI

Pas publikimit të listës së Vllaznisë të sezonit të ri futbollistik, Martini ishte një ndër specialistët që ka folur me superlativa. Sipas tij, objektivi i ekipit duhet të jetë vendi i katërt dhe të synohet një vend në Kupat e Europës.

“Vazhdoj të jem i mendimit se është ndërtuar një skuadër e mirë në këtë sezon. Unë do të thosha se me këtë grup minimalisht duhet luftuar për vendin e katërt e më pas duke parë e duke bërë. Vllaznia duhet të bëjë maksimumin edhe në Kupë, për të shpresuar në sigurimin me çdo kusht të një vendi në Kupat e Europës. Duhet që të këmbëngulet shumë në këtë drejtim”, ka mbyllur Martini. /Nga ADMIR URUÇI/