“Edhe muret kanë veshë” është aktiviteti më i fundit i Autoritetit për Informimin mbi Dokumentet e ish- Sigurimit të Shtetit (AIDSSH) që është prezantuar sot në zyrën e kryetares së Bashkisë së Shkodrës Voltana Ademi. Simbolika e përzgjedhur ka qënë domethënëse, teksa është zgjedhur 20 shkurti, i cili 27 vite më parë solli rrëzimin e bustit të diktatorit Enver Hoxha në Tiranë.
Aktiviteti ishte në kuadër të “Memorialit Kombëtar të Kampeve të Punës së detyruar” të kampit famëkeq të Tepelenës, ku veçohet pikërisht projekti “Edhe muret kanë veshë”. Synimi i takimit të sotëm ishte koordinimi me bashkitë kryesore në vend për mbledhjen e historive në mbarë vendin duke zgjedhur kështu kontributet më të mprehta nga secili rajon për tu projektuar në një monument ose pikë referimi në çdo vend.
Synime të projektit të prezantuar janë inkurajimi i pjesëmarrjes dhe dialogut të komunitetit ne lidhje me Shqipërinë komuniste dhe hijet e regjimit, nderimi dhe falenderimi i viktimave të tiranisë duke treguar historitë e tyre personale, krijimi i një kujtimi vizual, rigjetja- lidhja e të mbijetuarëve breda dhe jashtë vendit, nxitja e qasjeve të tjera për përcjelljen e kujtimeve dhe ndjesive të kohës për të krijuar një ditë kujtimi, për të mundsuar që historia e atyre viteve të jetë pjesë në plan- programin e historisë shqiptare që fëmijët e lindur pas rënies së komunizmit të mësojnë të vertetën rreth kësaj epoke.
Pasi ështtë njohur me projektin, kryebashkiakja e Shkodrës Voltana Ademi është shprehur e gatshme të jetë pjesë e tij. Madje, ajo ka shprehur dëshirën të jetë pjesë e grupit të punës që do të materializojë edhe idenë e projektit duke krijuar kontaktet e nevojshme në rajonin e Shkodrës me persona që mund të rrëfejnë historitë e tyre.
Organizatorët e projektit e mirëpritën përfshirjen e Ademit dhe të Bashkisë së Shkodrës si pjesë e realizimit të tij. Nga ana tjetër, ata shprehën vlerësimin për kontributin e Shkdrës dhe zonave rreth saj në përpjekjet antikomuniste. Ata u ndalën veçanërisht tek kontributi i Levizjeve të Kelmendit dhe të Postribës- të parat kundër komunizmit në Europën Lindore, por edhe për “historinë e re” me “14 janarin”, “13 dhjetorin” etj. ©ShkodraWeb