Një tjetëlr yll është shuar në qiellin e futbollit shkodran e shqiptar. Ka ndërruar jetë në moshën 79- vjeçare, legjenda e portës, Paulin Ndoja.
Ka qenë edhe kryetari i Bashkisë Shkodër, Benet Beci që ka përcjellë trishtimin e tij për këtë humbje në botën e sportit e veçanërisht, të futbollit.
“Një lajm i trishtë për Shkodrën dhe për gjithë botën e sportit! Ka ndërruar jetë, në moshën 79-vjeçare, legjenda e portës shkodrane, Paulin Ndoja. Dua t’i shpreh ngushëllimet më të sinqerta familjes Ndoja, miqve, si dhe të gjithë atyre që, ndër vite, e kanë lartësuar figurën e tij si ikonë të portës kuqeblu. Kontributi i tij i jashtëzakonshëm do të mbetet përgjithmonë i shkruar me germa të arta në historinë e Shkodrës dhe të Vllaznisë. Lamtumirë, Mjeshtër!”, shkruan Benet Beci.
Ai ka qenë pjesë e brezit të artë të futbollit shkodran në vitet ’60-‘70 përkrah emrave si Zhega, Rragami e Bizi, ndërsa përveç fushës së lojës, ka qenë edhe një trajner që ka përgatitur brezat pasardhës.
Ndoja, i cili ka marrë titullin :Mjeshtër i Madh:, ka qenë kampion dhe fitues i Kupës me Vllazninë, ndërsa në vitet ’70 ishte një nga futbollistët që u largua nga fusha e lojës për çështje biografie. Megjithatë, ai nuk u nda nga futbolli, por u kthye si trajner portierësh, duke u kthyer në një mësues për shumë breza. ShkodraWeb i shpreh ngushëllime familjes, të afërmëve dhe gjithë botës së madhe të futbollit e sportit në përgjithësi për këtë humbje.
