Një lajm i trishtë ka prekur sportin shkodran, veçanërisht basketbollin kuqeblu. Ish-basketbollisti dhe trajneri Fatjon Taraboshi, është ndarë nga jeta në moshën 39-vjeçare, por duke lënë pas një kontribut të vlerësueshëm në basketbollin shkodran.
Për një periudhe relativisht të gjatë ai u përball me probleme serioze shëndetësore. Me shpresën e përmirësimit të gjendjen së tij, Taraboshi iu nënshtrua edhe një ndërhyrjeje të vështirë kirurgjikale në Itali. Për ta mbështetur në këtë luftë të vështirë, miq, sportdashës dhe qytetarë shkodranë e përtej, u angazhuan në një fushatë solidariteti për mbulimin e shpenzimeve të trajtimit.
Gjatë karrierës së tij, Fatjon Taraboshi ishte një nga emrat e shquar të basketbollit shkodran, duke fituar titull kampion me ekipin e Vllaznisë. Pas përfundimit të karrierës si lojtar, ai vijoi të kontribuonte për sportin edhe në pozicionin e trajnerit.
Disa javë më parë, teksa vazhdonte luftën me sëmundjen, ai ishte nderuar nga Këshilli i Qarkut Shkodër me “Mirënjohje” për përkushtimin dhe kontributin e dhënë ndër vite në zhvillimin e basketbollit në Shkodër. Ndarja e tij nga jeta përbën një humbje të madhe për familjen, miqtë dhe komunitetin sportiv shkodran. ShkodraWeb i shpreh ngushëllime të sinqerta të gjithëve për këtë humbje të rëndë!
