Rapsodi i njohur Viktor Paloka, “Mjeshtër i Madh” është ndarë nga jeta pas një sëmundje të rëndë. Ai banonte në zonën e Vaut të Dejës dhe prej vitesh të shumta është bërë pjesë si virtualisht dhe realisht me këngët e tija për Mirditën, Shqipërinë por edhe këngë të temave të tjera.
Paloka ka një kontribut mbi 50-vjeçar në skenë, në krijimtari dhe në drejtim artistik. Jeta e tij ka qenë e lidhur pazgjidhshmërisht, që në lindje, me këngën dhe rapsoditë.
Ai ka qenë, gjithashtu, drejtues artistik i Ansamblit Folklorik të Vaut të Dejës dhe organizator i veprimtarive të shumta brenda dhe jashtë vendit, për të cilat është vlerësuar shpesh me çmime, trofe e diploma nderi.
Dashuria e tij për folklorin dhe përhapjen e tij është e jashtëzakonshme, duke e bërë pjesëmarrës në shumë simpoziume, konferenca e panele shkencore rreth trashëgimisë kulturore.
Ndërkohë, që në fushën e publikimeve, për vlerat e trashëgimisë kulturore, ai ka dhënë kontributin e tij me botimin e tre librave me tematikë traditat kulturore të zonës, botimin e disa albumeve muzikore, disa dokumentarëve dhe emisioneve televizive.
Ajo që e bënte Viktor Palokën të veçantë, si rapsod interpretues dhe organizator artistik është njohja e thellë dhe puna me pasion e përkushtim në drejtim të ruajtjes dhe përhapjes së trashëgimisë kulturore të zonës dhe asaj shqiptare.
Rapsodi do ti mungojë jo vetëm familjes dhe të afërmve por edhe artit, kulturës muzikës shqiptare. /ShkodraWeb/
