Një ngjarje e rëndë ka ndodhur në një familje shqiptare në Gjermani, ku dy djemtë e mitur të një çifti dhe babai i tyre janë gjetur të pajetë, ndërsa nëna ndodhet në gjendje kritike në spital. Gazeta gjermane Bild ka publikuar detaje nga ngjarja e cila është ende në hetim, ku ekspertët po përpiqen për të zbuluar shkakun e krimit të tmerrshëm.
Në median gjermane janë publikuar edhe fotot e viktimave dhe pamje nga vendi ku ka ndodhur krimi. Zhurma e të shtënave të armës mbrëmjen e 27 dhjetorit, u dëgjua rreth orës 22:53 në periferi të Hamburgut, në Kleiner Glinder Berg dhe fqinjët lajmëruan menjëherë policinë.
Efektivët gjetën të vdekur dy fëmijë të moshave 11 dhe 13 vjeçare, të ekzekutuar me plumb në kokë. Pak metra më tutje ndodhej trupi i Flamur R. 44 vjeç, babai i djemve, i vdekur. Arma e dyshuar e vrasjes ishte shumë afër tij.
Ndërsa pak më tutje ishte nëna e të miturve, Advije R. 38 vjeçe, e plagosur, në gjendje kritike, e cila është transportuar në spital. Sipas fqinjëve të familjes shqiptare, babai ishte gjaknxehtë. Ai mësohet se ka kërcënuar edhe të afërm të tij në të kaluarën, të cilët e kanë denoncuar atë në polici.
Prokuroria ka nisur hetimet dhe po analizon të gjitha provat në skenën e krimit. Sipas informacioneve të BILD, po verifikohet nëse babai ka qëlluar me armë gruan, fëmijët dhe më pas veten. Një fqinj i habitur është shprehur për Bild: “Djemtë ishin gjithmonë shumë të lumtur. I pashë një ditë më parë se të ndodhte ngjarja. Tani ata janë vrarë pak orë pas Krishtlindjeve. Nuk mund ta besoj”.
