Jessica Allen nga Kalifornia ishte zgjedhur si nënë surrogate për të mbajtur fëmijën e një çifti kinez për 30 mijë dollarë. Në javën e shtatë të shtatzënisë gruaja zbuloi se priste binjakë.
Gjithçka vazhdoi normalisht deri në momentin që binjakët lindën. Por pas lindjes u zbulua se njëri nga binjakët ishte fëmija biologjik i Jessica-s dhe tjetri i çiftit kinez. Por për Jessica-n nuk ishte aspak e thjeshtë të merrte fëmijën e saj biologjik, pasi ajo dhe bashkëshorti nuk ishin prindërit e ligjshëm të binjakëve dhe emrat e tyre nuk figuronin gjëkundi.
Jessica kishte vendosur pas lindjes së djalit të saj të dytë, në vitin 2015 që të jepte me qira mitrën e saj dhe për t’i dhuruar kështu një çifti kënaqësinë që të bëheshin prindër. Kështu ajo kontaktoi me agjencinë Omega Family Global, në Kaliforni. Prej aty njohu çiftin nga Kina, të cilët ishin në kërkim të një nënë surrogate. Në Kinë kjo praktikë është e ndaluar. Çifti i ofroi Jessica-s 30 mijë dollarë për të lindur fëmijën e tyre.
Jessica lindi binjakët në javën e 38-të dhe vogëlushët u larguan menjëherë nga nëna. Ajo i pa vetëm disa javë më vonë pasi nëna i dërgon asaj foto të binjakëve duke i shkruar” Janë të ndryshëm, ke ndonjë ide pse”? Jessica tha për New York Post se binjakët ishin të ndryshëm, njëri ishte aziatik, ndërsa tjetri ishte mulat dhe i ngjante dy fëmijëve të tjerë dhe të atit të tij.
Ajo që sqaroi çdo gjë ishte testi AND-së, ku rezultoi se njëri nga binjakët ështe fëmija biologjik i nënës surrogate. Me shtatzëninë e Jessica-s ndodhi ajo që mjekët quajnë, “superfetazione”. Sipas mjekëve kjo gjë ndodh kur një vezë fekondohet, ndërkohë që femra është shtatzënë. Por Jessica siguroi mjekët se kishte respektuar urdhrat e mjekut, duke kryer marrëdhënie me bashkëshortin vetëm pasi mori vesh që ishte shtatzënë.
Kështu Jessica dhe bashkëshorti menjëherë pasi zbuluan rezultatin e AND-së donin të merrnin fëmijën e tyre. Çifti nga Kina nuk dëshironin ta mbanin fëmijën tjetër, por ata kërkonin shpërblim nga çifti amerikan, në të kundërt do ta jepnin fëmijën për adoptim. Dhe vetëm pas një betejë të gjatë ligjore çifti nga Kalifornia arriti të marrë vogëlushin e tyre pas paguar asnjë qindarkë.