U luajtën mbrëmjen e sotme, ndeshjet e kthimit në çerekfinalet e Champions League, ku në dy takime, u shënuan plot 12 gola. Ndeshje e çmendur, e denjë për një skenar filmi, ishte ajo mes Mançester Sitit dhe Totenhemit. Ekipi i Guardiolës fitoi me shifrat 4-3, por humbja 1-0 në takimin e parë, bëri që të eliminohet nga golat në fushë kundërshtare të “spërsave”.
Fillimi ishte zjarr, me Sterling që hapi lumin e golave në minutën e katërt, por ekipi i Poçetinos përmbysi menjëherë me golat e Son në minutat 6 dhe 10.
Vetëm 60 sekonda kaluan, dhe Bernardo Silva barazoi sërish në 2-2. Siti nuk ishtë dorëzuar, dhe Sterling shënoi edhe të tretin për ekipin e tij, duke ndezur edhe njëherë shpresat për kualifikim. Në pjesën e dytë, shkëndijën e dha Aguero, me një gol mjaft të bukur në minutën e 59-të.
Por, Totenhemi nuk ishte dorëzuar, dhe në minutën e 73-të, Jorente shënoi nga zhvillimet e një goditje këndi, duke barazuar rezultatin e përgjithshëm në 4-4. Pati kohë edhe për një gol të pestë nga Sterling në minutën e 93-të, por festa e shfrenuar për “qytetarët” u ndalua, pasi në VAR u pa se Aguero që dha pasimin ishte në pozicion jashtë loje. Në fund, Totenhemi kalon në turin tjetër.
Në ndeshjen tjetër, nuk pati shumë histori. Liverpuli fitoi me shifrat e thella 1-4 në fushën e Portos, pas fitores që kishte arritur edhe në takimin e parë në shtëpi, me rezultatin 2-0. Golat për ekipin e Klop u shënuan nga Mane, Salah, Firminjo dhe Van Dijk, ndërsa goli i nderit për portugezët u shënua nga Militao.
