“Sapo mësova nga media se ministrja e Arsimit ka vendosur pezullimin tim nga detyra e rektorit të Universitetit të Tiranës dhe i paskërka kërkuar Presidentit të Republikës së Shqipërisë shkarkimin tim. Dhe këtë vendim e paskërka mbështetur në një inspektim të Ministrisë që ajo drejton. Në dijeninë time, nga kjo ministre nuk ka ardhur asnjë grup inspektimi, sepse, në rast të kundërt, do të isha unë i pari që do ta mësoja një gjë të tillë”, nënvizon Koni. Në fakt, vendimi për pezullim nuk është surprizë për të. Por përpos të gjithave, Koni këmbëngul se para kësaj do të nevojitej së paku një bisedë e drejtpërdrejtë me ministren e Arsimit, qoftë dhe për ta dëgjuar.
“Në fakt, ishte e pritshme nga ana ime që situata do të shkonte deri këtu, pas gjithë atyre sulmeve të pashembullta që prej shumë kohësh janë adresuar ndaj per sonit tim. Përpara se të merrte një vendim të tillë, ministrja duhet të më kishte mundësuar një takim apo të më kishte dëgjuar se çfarë realisht po ndodh në Universitetin e Tiranës, por siç duket, e tremb e vërteta”, thotë rektori, duke hedhur akuza për një veprim të komanduar nga lart.
“Edhe një herë, me prononcimin e saj të fundit, u kuptua edhe më qartë se kush e urdhëron ministren dhe se kush kërkon të ‘gllabërojë’ pasuritë e Universitetit të Tiranës”. Largimi i tij vjen pas një javë intensive akuzash e sulmesh të drejtpërdrejta nga ana e kreut të qeverisë, Edi Rama, sipas të cilit, Koni është përgjegjës për shumicën e problematikave që kanë studentët dhe që për asnjë moment nuk ka shprehur kurr farë vullneti për t’i zgjidhur. Kjo deklaratë u bë në takimin me përfaqësues të Fakultetit Ekonomik që drejtohet nga “armiku” i Konit, Dhori Kule. Nuk vonoi shumë reagimi i rektorit, i cili i kërkoi Ramës që përgjegjësit t’i kërkonte tek ata që ndodhen në krah të tij. Një lumë pakënaqësish mbi menaxhimin e Universitetit të Tiranës ka shpërthyer ndaj titullarit që në kohën e protestave studentore, të pasuara edhe në përfundim të saj me qëndrimin luajal që mbajti rektori mbi zaptimin e ambienteve të Fakultetit Juridik. /Nga Besarta BASHA/
