Është një nga ngjarjet më të trishta jo vetëm të Shkodrës, por edhe më gjërë. Një i ri, vetëm 18- vjeç nga Shkodra, rezulton i zhdukur që nga viti 1993. Familja e tij, babai, nëna, 3 motrat, të afërmit, nuk kanë rreshtur së kërkuari, me të gjitha mundësitë që kanë patur në dispozicion.
Është historia e Francit, emri i tij i saktët, Françesk Simon Pjetri, i cili bashkë me një shok të ngushtë, u largua nga shtëpia me 22 shtator 1993. Mendohet se të dy të rinjtë, kanë patur si synim ikjen drejt Greqisë.
Ka qenë motra e Francit, Laura Pjetri, e cila jeton prej vitesh në Itali, që ka rikthyer sërish në vëmendje këtë ngjarje të trishtë. Ajo ka shkruar në faqen në Facebook të ShkodraWeb, duke apeluar për ndihmë.
“Françesk Simon Pjetri është larguar më datën 22 shtator 1993 në moshën 18 vjeç nga shtepija e tij në Shkodër, pranë në kinema “Republika”
(Millennium). Që nga ajo ditë nuk ka asnjë informacion per të, si dhe as per shokun e tij Eduard Zef Hyseni. Nuk dihet se ku kanë shkuar, as
dhe se çfarë kufirit kanë kaluar.Franci ka lindur me dt. 02-03-1975 në Shkodër. Baba e nana i kanë vdekë, deri në ditët e fundit të jetës tyne t’u e kërku. Unë jam njena prej tre motrave. Ju lutem kush të ketë mundësi të na ndihmojë e ta shpërndajë në profilin e vet në Facebook, apo të grupeve që njef në çdo vend të botës, sa ma shumë të hapet, aq ma shumë mundësi ka me pas ndonjë informacion.
Eshtë vëllai im i vetëm. Ne jemi tri motra dhe të trija në emigracion, dy në Itali dhe një në Spanë. Unë që po ju shkruaj, në 1993 isha në Itali, ndërsa vëllai Franci, bashkë me shokun e vet të ngushte një natë para se me ik në emigracion, ka fjet tek posta e qytetit të Shkodrës. Të nesërmen ka marrë furgonin bashkë me shokun e tij Eduard Hyseni për në Greqi.”, shkruan Laura Pjetri.
Ndërkohë, ajo ka dërguar një foto të kohës të vëllait të saj por edhe një kërkesë, që nëna e Francit, ka dërguar tek institucionet, duke kërkuar ndihmë për gjetjen e djalit të vetëm të saj. Të gjithë personat që kanë çfarëdolloj informacioni lidhur me këtë ngjarje, janë të lutur të kontaktojnë në çdo kohë me numrin e celularit të Laura Pjetrit +39 333 296 4816.
