“Dosja 339”, prokuroria sqaron pozicionin e gazetares: Klodiana Lala nuk është nën hetim për nxjerrje sekreti…

Prokuroria ka bërë të ditur se gazetarja Klodiana Lala, nuk është person nën hetime dhe pse ka publikuar materialet e “dosjes 339”, përgjimet që përfshijnë Kryebashkiakun e Durrësit, Vangjush Dako dhe të fortët e Shijakut të njohur si vëllezërit Avdylaj. Prokuroria bën të ditur se hetimi ka nisur për zyrtarët të cilët kanë patur akses në këtë dosje dhe më pas kanë bërë të mundur shpërndarjen e saj në media.

“Prokuroria pranë Gjykatës së Shkallës së Parë për Krime të Rënda Tiranë ka njoftuar se po kryhen hetime për veprën penale “Zbulimi i akteve ose të dhënave sekrete”, të parashikuar nga neni 295/a i Kodit Penal, të lidhur me publikimin në mediat elektronike dhe të shkruara të disa akteve proçedurale të proçedimit penal nr.339 viti 2016.

Hetimet ne lidhje me këtë vepër penale kanë filluar që në muajin nëntor 2018 dhe lidhen me faktin se duke filluar që nga viti 2017 dhe në vazhdim, në kundërshtim me ligjin janë bërë publike akte sekrete të përgjimeve të këtij procedimi penal. Informojmë opinionin publik se gazetarja Klodiana Lala nuk është person nën hetim në këtë proçedim penal dhe nuk është duke u hetuar nga ky organ procedues”, thekson Prokuroria e Krimeve të Rënda.

Prokuroria bën të ditur se ndaj personave që kanë dekonspiruar dosjen do të merren masa ligjore.

“Hetimet janë duke u kryer në lidhje me veprimet dhe mosveprimet e personave të tjerë funksionarë të organeve të drejtësisë, të cilët kanë hartuar aktet e përgjimeve, kanë administruar këto akte dhe kanë patur akses në to, por dhe kushdo tjetër që në bazë të ligjit është njohur me aktet e sipërcituara dhe ka patur detyrimin ligjorë për ruajtjen e sekretit hetimor si dhe marrjen e masave të nevojshme për ndalimin e publikimit të akteve të proçedimit penal të mësipërm”, thuhet në njoftimin e Prokurorisë.