Janë dorëzuar sot në mbrëmje në selinë e Partisë Demokratike 4200 firmat e delegatëve për mbledhjen e Kuvendit Kombëtar të demokratëve.
Dorëzimi i firmave në selinë blu vjen një muaj para mbajtjes së Kuvendit Kombëtar, që është përcaktuar të mblidhet më 11 dhjetor nga Sali Berisha.
Dorëzimi i firmave është bërë pak pas përfundimit të konferencës për media të ish-kryeministrit nga mbështetës të Berishës, si Flamur Noka, Edmond Spaho, Aldo Bumçi, Klevis Balliu, Albana Vokshi.
Më herët Berisha tha se firmat do ti dorëzohen kryetarit të Këshillit Kombëtar Edi Paloka.
“Grupi përfaqësues i firmëtarëve ka vendosur që këto formularë historikë të rithemelimit të pluralizmit politik ti depozitojë në selinë e PD, të kryetari i Këshillit Kombëtar të PD, z.Edi Paloka. Do thoni pse kjo përzgjedhje? I vetmi institucion apo forum Brenda saj i konstituar pas Kuvendit është Këshilli Kombëtar.
Vetë kryetari nuk ka mbledhur akoma Kryesinë e PD-së. Këshilli Kombëtar është forumi më i lartë pas Kuvendit, është konstituar dhe ka bërë një mbledhje. Verifikimi i mandateve sipas rregullit të cdo Kuvendi bëhet dhe ju lutem ta fiksoni mirë, bëhet vetëm nga Kuvendi. Vetëm Kuvendi ka të drejtën statutore të verifikojë mandatin e zonjës apo zotërisë që ka firmosur formularin”, tha më herët Berisha.
