Nga sot Donald Trump është presidenti i 47- të i Shteteve të Bashkuara të Amerikës.
“Koha e rënies së Amerikës ka mbaruar. Zoti më shpëtoi ta bëj Amerikën të madhe sërish. Epoka e artë fillon pikërisht tani” tha Presidenti Trump në fjalimin e tij menjëherë pas betimit mbi Kushtetutë.
Miliona amerikanë dhe jo vetëm, mbarë bota ndoqi live ceremoninë e inaugurimit që u mbajt brenda Kapitolit për shkak të temperaturave të ftohta.
“Nga kjo ditë vendi ynë do të lulëzojë e do na kenë zili të gjithë kombet. Prioriteti ynë kryesor do të jetë krijimi i një kombi krenar, të begatë dhe të lirë”, vijoi më tej Trump në fjalimin e tij 20 minutësh.
Ai premtoi se do të sjellë paqen në botë, teksa u shpreh se Gjiri i Meksikës, do të quhet Gjiri i Amerikës.
Tha se sot do të firmosë shpalljen e emergjencës në kufirin jugor me Meksikën për të luftuar emigracionin e paligjshëm dhe dekretin për të pasur vetëm dy gjini. Shpalli dhe synimet ekspansioniste në Kanalin e Panamasë.
“Sovraniteti ynë do të rifitohet, siguria jonë do të rikthehet, peshorja e drejtësisë do të ribalancohet”, tha Trump, duke shtuar se “armatosja e egër, e dhunshme dhe e padrejtë” e Departamentit të Drejtësisë në SHBA, do të marrë fund.
Do të ndërtojmë ushtrinë më të fortë që bota ka parë. Do të ndalojmë lufrat dhe nuk do të hyjmë më asnjëherë në luftra. Amerika do të rimarrë vendin e merituar si vendi më i madh, më i respektuar, do të admirohet në të gjithë botën, nga sot do të ndryshojmë emrin e Gjirit të Meksikës, do ta quajmë Gjiri i Amerikës.
Ceremonia u mbajt brenda ndërtesës së Kapitolit, në Rotondë, ashtu siç ndodhi për Ronald Reagan në vitin 1985. Para Trump u betua dhe zv/presidenti JD Vance. Presidenti Trump këtë post, e mbajti edhe nga viti 2017 deri më 2021.
