Sipas Komisionerit Shtetëror të Zgjedhjeve Ilirjan Celibashi, në Shqipëri ka vakancë për vetëm 3 bashki sa i takon postit të kryebashkiakut. Kështu thuhet në shkresën zyrtare, me të cilën Celibashi i përgjigjet Presidentit të Republikës.
Konkretisht, sipas KQZ- së, ka informacion zrytar për vakanca vetëm në Bashkinë Vorë, Shkodër dhe Dibër. Ndërkohë, është një fakt i ditur botërisht se janë 6 bashki ku ka vakanca për postin e kryebashkiakut, por mesa duket Celibashi nuk është njoftuar zyrtarisht. Lidhur me bashkitë Durrës, Lushnje dhe Rrogozhinë, KQZ nuk ka informacion.
Ditën e premte presidenti Ilir Meta kërkoi informacion zyrtar nga KQZ lidhur me vakancat në bashkitë e vendit, duke lënë të hapur mundësinë për shpalljen e zgjedhjeve të parakohëshme vendore për 6 bashkitë. Ndërkohë, KQZ ka nënvizuar se vetëm në tre ka vakancë.
Mbetet të shihet reagimi i Presidentit Meta pas kësaj përgjigje, ndërsa më pas mund të nisin dilema të shumta administrative, organizative por edhe politike. Sipas Kodit Zgjedhor, zgjedhjet e parakohëshme thirren 45 ditë nga vakanca e shpallur. Nga ana tjetër, i njëjti Kod përcakton si periudha zgjedhore 15 prill- 15 maj dhe 15 shtator- 15 tetor. Por ashtu, problematikë jo të vogël paraqet përpilimi, shpallja dhe korrigjimi i listave të zgjedhësve, i cili kërkon kohën e vet. Politikisht, me situatën aktuale në PD, mazhoranca aktuale është thellësisht e avantazhuar, duke kthyer thjesht në formalitet marrjen e 6 bashkive. /ShkodraWeb/
