Pas më shumë se një viti, SPAK duket se ka mbyllur një çeshtje, e cila u përhap mediatiksiht lidhur me kryetarin e PSD- së Ardian Hysa në kuadër të zgjedhjeve politike të majit 2025.
Në atë kohë, PSD në qendër reagoi edhe me një deklaratë, duke hedhur poshtë aludimet mediatike si dhe duke publikuar edhe procesverbalin e kontrollit të banesës së kryetarit Ardian Hysa.
“Lidhur me disa lajme të bëra publike dhe të shpërndara në media të ndryshme, për përfshirjen në veprimtari të paligjshme zgjedhore të disa anëtarëve të shtabeve elektorale të PSD-së në veri të vendit, Partia Socialdemokrate përgënjeshtron çdo lajm të tillë. Është një dizinformim i qëllimtë dhe dashakeqës.
Lajmet janë të pavërteta dhe spekulative; janë sulme të drejtpërdrejta ndaj PSD-së, pasi asnjë nga anëtarët tanë nuk është përfshirë në krime zgjedhore. Nuk ka patur prezencë të policisë dhe as BKH-së në asnjë shtab, në asnjë zyrë elektorale. Këto janë shpifje monstruoze dhe të papranueshme.
Ne mbështesim SPAK-un në mënyrë të padiskutueshme, madje kemi bërë deklarata të shpeshta si dhe thirrje për SPAK-un dhe GJKKO-në që të hetojnë çdo krim zgjedhor. Për më tepër, PSD-ja ka kërkuar ndihmë dhe mbështetje të autoriteteve përkatëse që të marrin seriozisht ankesat e qytetarëve në Qarkun e Shkodrës dhe të hetojnë fuqimisht çdo shkelje të ligjit në drejtim të krimeve zgjedhore.
PSD-ja nuk ka patur dhe nuk ka asnjë lidhje me askend tjetër të cilëve u janë kryer kontrolle në zyrat apo banesat e tyre. Në vijim, kushdo që përfshihet në të tilla krime zgjedhore duhet të mbajë përgjegjësi ligjore dhe PSD-ja do të distancohet menjëherë.
Të vetmit person që i është kryer kontroll në banesën e tij është Kryetari i PSD-së për Malësinë e Madhe, z. Ardian Hysa. Sipas procesverbalit të lëshuar nga SPAK-u, rezulton se nuk është gjetur asgjë e paligjshme në banesën dhe mjedisin e tij të punës. Z. Hysa është treguar bashkëpunues dhe ka shprehur gadishmërinë e tij për të qenë në dispozicion të organeve ligjzbatuese. Bashkëlidhur gjeni procesverbalin e lëshuar nga SPAK-u.”. thuhej në atë deklaratë rreth 1 vit më parë.
Ndërkohë, para pak ditëve, për të vertetuar mbylljen e plotë të çeshtjes, SPAK ka lëshuar edhe një vertetim ku saktëson se nuk ka asnjë çeshtje për shtetasin Ardian Hysa. Në fakt, do të ishte mirë që, siç njofton zyrtarisht apo jo zyrtarisht për kontrolle, hetime apo procedime, edhe në rast mbyllje apo pushimi të tyre, SPAK të njoftojë mediat.
