DOKUMENTI/ Rama ben leshimin e pare ndaj Bashes, i ndryshon rregulloren e Kuvendit…

Megjithëse u fol për një shumicë totalitare nga opozita dhe një kryetar parlamenti të rreptë, maxhoranca e kryeministrit Edi Rama ka vendosur të bëjë disa lëshime. Këto lëshime kanë filluar me ndryshimin e rregullores së Kuvendit. Partia Demokratike ka 43 deputetë në Kuvend e me sa duket nuk i mbulon dot të gjitha komisionet parlamentare, pasi rregullorja e vjetër thotë se një deputet nuk mund të jetë anëtar i përhershëm në më shumë se një komision. Kjo gjë e ka vendosur në vështirësi PD-në por ka ardhur dhe lëshimi nga maxhoranca.

Grupi parlamentar i Partisë Socialiste i ka bërë një propozim Kuvendit për ndryshim të rregullores që deputetët të lejohen në dy komisione.

Ky propozim është pranuar nga kreu i Kuvendit Gramoz Ruçi. Kanë qenë 30 deputetë të PS-së që kanë firmosur propozimin që do të sjellë një përfaqësim proporcional PS-PD në komisionet parlamentare.

Në bazë të rregullores së ndryshuar, “në respektim të raporteve shumicë parlamentare-opozitë, deputetë të caktuar mund të jenë anëtarë të jo më shumë se dy komisioneve të përhershme. Deputeti mund të marrë pjesë në mbledhjet e komisioneve të tjera, por pa të drejtë vote”. /balkanweb/

PROPOZIMI
Grupi Parlamentar i Partisë Socialiste
I nderuar zoti Kryetar i Kuvendit,
Në mbështetje të nenit 117 të Rregullore, Ju paraqesim propozimin për një ndryshim në Rregulloren e Kuvendit.
Në mbështetje të nenit 28 të Rregullores parashtrojmë kërkesën për shqyrtimin me procedurë të përshpejtuar të këtij projektvendimi.
Duke Ju falënderuar për vëmendjen, Taulant Balla, Kryetar.

Kuvendi i Republikës së Shqipërisë vendosi:
1. Në vendimin e Kuvendit nr. 166, datë 16.12.2004 “Për miratimin e Rregullores së Kuvendit të Republikës së Shqipërisë”, të ndryshuar, bëhet ky ndryshim:
Në nenin 20, pika 2 ndryshon si më poshtë:
“2. Si rregull, deputeti mund të jetë anëtar vetëm i një komisioni të përhershëm. Në respektim të raporteve shumicë parlamentare-opozitë, deputetë të caktuar mund të jenë anëtarë të jo më shumë se dy komisioneve të përhershme. Deputeti mund të marrë pjesë në mbledhjet e komisioneve të tjera, por pa të drejtë vote”.
Ky vendim hyn në fuqi menjëherë.
Kryetari Gramoz Ruçi.