Ndërsa KF Vllaznia dhe Bashkia Shkodër, janë futur në një debat publik për zhvillimin e koncertit të këngëtarit Bujar Qamili në stadiumin “Loro Boriçi”, klubi kuqeblu duket se ka vendosur të futë në mes edhe Federatën Shqiptare të Futbollit- FSHF.
KF Vllaznia, në faqen e vet në Facebook, ka publikuar një shkresë të shkurtit të këtij viti, që FSHF i drejton Bashkisë Shkodër, për dijeni edhe KF Vllaznia, me lëndë “Mbi përdorimin e Stadiumit ‘Loro Boriçi'”.
Në publikimin e KF Vllaznia, ka edhe këtë koment që shoqëron shkresën e FSHF- së për Bashkinë Shkodër:
“Në lidhje me polemikat e krijuara së fundi për stadiumin “Loro Boriçi” dhe funksionin që ai duhet të luajë, për transparencë dhe informim të opinionit sportiv, po publikojmë shkresën zyrtare që FSHF i adresoi pak muaj më parë Bashkisë Shkodër duke i kujtuar se nuk mund të ketë devijime nga projekti sportiv i destinacionit të këtij impianti.”, thuhet në publikimin e KF Vllaznia në Facebook.
