Gjatë kohës që zëdhënësja e PD- së Ina Zhupa lexonte emrat e delegatëve të PD- së që kanë konfirmuar pjesëmarrjen në Kuvendin Kombëtar të PD- së, kanë nisur reagimet e para në media dhe në rrjetet sociale.
U fol për falsifikim firmash nga persona që kanë dëgjuar të shqiptohet emri i tyre nga Zhupa. Mes tyre, ishte edhe emri Nikoll Marku, i cili në Shkodër njihet si ish- kryekomunar i Velipojës por edhe kryetar grupseksioni të PD- së po në Velipojë.
Në një reagim pasi ka dëgjuar emrin e tij, Nikollë Marku, kryetar grupseksioni i PD Velipojë ka thënë: “Në mënyrë absolute kam firmosur për datën 11 dhjetor! Dhe nesër do të jem që në ora 09:00 e mëngjesit për në Kuvendin Kombëtar!”.
Por si është e verteta? ShkodraWeb ka bërë një verifikim të shpejtë dhe ka rezultuar se është e vertetë, Nikoll Marku ka firmosur për pjesëmarrjen si delegat në Kuvendin Kombëtar të 18 dhjetorit. Por ky Nikoll Marku firmëtar, nuk është Nikoll Marku ish- kryekomunar i Velipojës por një drejtues i PD- së në Lezhë. Thjesht, është lexuar i njëjti emër, pa thënë atësinë apo edhe degën e PD- së. Të paktën në këtë rast, nuk duket se ka falsifikim.
Mbase mund të ketë edhe emra të tjerë, të njëjtë dhe do të ishte mirë ti verifikonte çdokush para se të shprehej se është ai dhe i është falsifikuar firma. Nga ana tjetër, PD duhet të afishojë në faqen zyrtare listën e plotë të delegatëve të Kuvendit Kombëtar, sipas degëve, që secili të bëjë verifkimet e duhura. /ShkodraWeb/
