Pasi kryetarja e Gjykatës Kushtetuese, Holta Zaçaj kërkoi një interpretim Komisionit të Venecias për vijimin e mandatit të saj në krye të këtij institucioni, Gjykata e Lartë ka nisur procedurat për zëvendësimin e saj.
Kreu i Gjykatës së Lartë, Sokol Sadushi ka shpallur hapjen e procedurës së aplikimit për zëvendësimin e drejtuesit të Gjykatës Kushtetuese.
Duke iu referuar Kushtetutës së Shqipërisë e cila parashikon se Gjykata Kushtetuese përtërihet çdo 3 vjet me një të tretën e saj, Sadushi shkruan se “përtëritja e përbërjes së Gjykatës Kushtetuese është një proces kushtetues, ku përfshihen tre organe emërtese, Presidenti, Kuvendi dhe Gjykata e Lartë, që zgjedhin çdo tre vjet, përkatësisht, nga një anëtar të kësaj gjykate. Për të garantuar përtëritjen e rregullt të Gjykatës Kushtetuese, ky proces është i detyrueshëm për t’u kryer në kohë nga tre organet e emërtesës, me qëllim shmangien e çdo krize a tensioni, që mund të cenojë legjitimitetin dhe funksionimin normal të vetë Gjykatës, si autoriteti më i lartë, që interpreton në mënyrë përfundimtare Kushtetutën”.
LEXONI EDHE: Mbarimi i mandatit si anëtare, kryetarja e Gjykatës Kushtetuese i drejtohet Komisionit të Venecias për interpretim…
Nga ana e saj, një ditë më parë Holta Zaçaj ka kërkuar vijimin e mandatit për ripërtëritjen e tij në vitin 2025.
“Mandati i gjyqtares Holta Zaçaj rregullohet nga neni 179, pika 3, i Kushtetutës, i cili parashikon se, me qëllim përtëritjen e rregullt të përbërjes së Gjykatës Kushtetuese, gjyqtari që do të zëvendësojë gjyqtarin të cilit i mbaron mandati në vitin vitin 2017, do të qëndrojë në detyrë deri në vitin 2025.
Mbi bazën e kësaj dispozite kushtetuese edhe Gjykata e Lartë në vendimin e saj nr. 2, datë 16.01.2023 ka deklaruar: “Zgjedhjen e Znj. Holta Zaçaj si anëtare e Gjykatës Kushtetuese me mandat të pjesshëm deri në kryerjen e ripërtëritjes në vitin 2025”, shkroi dje Zaçaj.
KLIKO KËTU PËR TË LEXUAR TË PLOTË NJOFTIMIN E GJKATËS SË LARTË
