Administratori i Universitetit “Luigj Gurakuqi” i Shkodrës, Admir Uruçi, ka dhënë dorëheqjen nga ky pozicion. ShkodraWeb ka siguruar shkresën e dorëheqjes, drejtuar nga Uruçi Bordit të Administrimit të UNISHK dhe për dijeni, rektorit Tonin Gjuraj.
Në tekstin e dorëheqjes, Uruçi sqaron se jep dorëheqjen “për të shmangur çdo situatë që mund të interpretohet si pengesë apo si ngadalësim i proceseve administrative, financiare dhe akademike të Universitetit, si dhe për të garantuar që funksionimi i institucionit të vijojë i qetë, pa pengesa dhe në perputhje me drejtimin që ai dëshiron të japë”.
Administratori Uruçi falenderon tre rektorët me të cilët ka punuar për bashkëpunimin dhe Bordin e Administrimit, në veçanti kryetarin Adrian Leka. Admir Uruçi ishte në detyrën e administratorit të UNISHK që nga data 1 nëntor 2022.
Ndërkohë, lidhur me këtë akt të administratorit Uruçi, ka reaguar përmes rrjeteve sociale edhe Universiteti “Liigj Gurqkuqi” i Shkodrës. Në një publikim në Facebook, lexohet: “Pasi u njohëm me dorëheqjen e Administratorit të UNISHK, z. Admir Uruçi, vlerësojmë aktin e tij qytetar dhe në shërbim të institucionit. Për periudhën që kemi qenë bashkëudhëtarë në shërbim të Universitetit, i shprehim falënderimet tona për angazhimin e treguar.Duke i uruar z. Uruçi suksese në impenjimet e tij të mëtejshme, rikonfirmojmë synimin tonë për ngritjen e vazhdueshme të UNISHK, me prioritet stabilizimin e ligjshmërisë në institucionin tonë dhe transparencën me mediat dhe qytetarët.”.
TEKSTI I DORËHEQJES NGA ADMINISTRATOR I UNISHK
Të nderuar!
Me anë të kësaj shkrese zyrtare, ju parashtroj vendimin tim për të dhënë dorëheqjen nga detyra që mbaj aktualisht pranë Universitetit si Administrator i Universitetit të Shkodrës “Luigj Gurakuqi”. Kjo kërkesë është bazuar nga kërkesa e Rektorit Z.Tonin Gjuraj drejtuar mua personalisht nga ana Tij kjo e kërkuar edhe në mbledhjen e përbashket me Bordin e Administrimit.
Gjatë periudhës së ushtrimit të këtij funksioni, kam synuar të kontribuoj me përkushtim, profesionalizëm dhe korrektësi në përmbushjen e detyrave të ngarkuara, duke pasur gjithmonë parasysh interesin më të lartë të institucionit. Megjithatë, duke marrë parasysh kërkesën e Rektorit të drejtpërdrejtë, në të cilën më bëhet me dije se prania ime në këtë pozicion konsiderohet si pengesë për vijimin e punës sipas vizionit të tij drejtues, kam vendosur që të tërhiqem në mënyrë vullnetare nga kjo detyrë.
Ky hap merret për të shmangur çdo situatë që mund të interpretohet si pengesë apo si ngadalësim i proceseve administrative, financiare dhe akademike të Universitetit, si dhe për të garantuar që funksionimi i institucionit të vijojë i qetë, pa pengesa dhe në perputhje me drejtimin që ai dëshiron të japë.
Dua të falenderoj për mundesinë e bashkëpunimit gjatë kësaj periudhe, Bordin e Administrimit, e në veçanti Kryetarin e Bordit Z. Adrian Leka për të gjithë mbështetjen e dhënë, për të kryer sa më mirë detyrat e mia funksionale, Rektorët me të cilët kam punuar që nga ushtrimi i këtij pozicioni nga data 21 Nëntor 2022 Prof.Dr. Znj Suzana Golemi, Prof Dr. Znj.Rajmonda Kçira, Prof Dr. Z. Tonin Gjuraj si dhe përfaqësuesit në dy senatet akademike.
Ju uroj rrugëtim të mbarë në punën tuaj.
Me respekt
Administratori
Admir URUÇI
