Mbledhje e fundit e Këshillit Bashkiak të Shkodrës për këtë vit, do të jetë më e rëndësishmja e 2023- it. Ndër pikat e rendit të ditës, është shqyrtimi dhe miratimi eventual i buxhetit të Bashkisë Shkodër për vitin 2024.
Sipas njoftimit zyrtar të sekretarisë së Këshillit Bashkiak, mbledhja do të zhvillohet ditën e premte, datë 29 dhjetor 2023, duke nisur nga ora 15.00. Ndërsa pika e buxhetit është e pesta, më herët do të ketë edhe vendime të tjera të rëndësishme.
Kështu, pritet të ketë ndryshime të taksave dhe tarifave vendore por edhe ndryshim të nivelit të pagave të funksionarëve të zgjedhur, emëruar, të nëpunësve civilë dhe të punonjësve administrativë të Bashkisë Shkodër dhe institucioneve të varësisë.
Si mbledhja më e rëndësishme e këtij viti, ajo e 29 dhjetorit pritet të jetë e gjatë me debate e diskutime, edhe pse ka patur raste kur ka zgjatur më pak se mbledhjet e tjera të Këshillit Bashkiak të Shkodrës.
