Mbrëmjen e të mërkurës, mediave iu shpërnda një dokument, “Deklaratë publike” e Asamblesë së Fakultetit të Drejtësisë së UNISHK në lidhje me përplasjen fizike mes sekretares mësimore të Fakultetit të Drejtësisë me një studente. Siç mund ta konstatoni edhe më poshtë në dokument, kërkohet largimi i menjëhershëm nga puna e sekretares M.H., duke mbështetur edhe propozimin e Dekanatit për Rektoratin, i datës 04.06.2026, ditën kur ndodhi ngjarja.
Siç thuhet edhe në deklaratën e Asamblesë së Fakultatit të Drejtësisë, propozimi i Dekanatit për Rektoratin, është bërë ditën e ngjarjes. Pra, qartazi, asnjë nga palët në konflikt, sekretarja mësimore dhe studentja e diplomuar, nuk janë thirrur për tu dëgjuar në versionet e tyre. Është parimi elementar i praktikave juridike dhe për një Fakultet Drejtësie, është një neglizhencë jo e vogël. Çdokush ka të drejtë të dëgjohet përpara se të jetë subjekt i një vendimmarrje të mundshme që ka të bëjë me të.
Ndryshe nga Dekanati, Rektorati e ka zbatuar këtë praktikë elementare juridike, duke thirrur dhe dëgjuar dy palët në konflikt. Siç mund ta shikoni edhe më poshtë, në dokumentin e siguruar nga ShkodraWeb, vetëm pas kësaj procedure, është arritur në një vendimmarrje për sekretaren mësimore, “vërejtje me paralajmërim për largim nga detyra”. Ndërkohë, studentja e diplomuar eshte pritur në zyre nga Rektori, në prani të gazetares së emisionit STOP, siç tregojne edhe pamjet tanimë publike.
Sekretarja mësimore M.H., nuk ka patur asnjë masë të asnjë lloji paraprakisht, dhe në këto raste, masa duhet të jetë proporcionale me shkeljen e kryer. Nga ana tjetër, Prokuroria ka nisur procedurat hetimore për ngjarjen, pasi një nga palët ka bërë edhe kallëzim. Paralelisht, palët kanë komunikuar mes tyre dhe por ecet drejt pajtimit.
Parimi tjetër që natyrisht, në Fakultetin e Drejtësisë, duhet ta njohin është “secili konsiderohet i pafajshëm deri në marrjen e një vendimi të formës së prerë”. Jo më kot ka disa gjendje gjyqësore që nisin “në hetim”, “i pandehur”, “i paditur”, “i paraburgosur”, “i burgosur” etj. Këtë pedagogët e Fakultetit Juridik, si specialistë të kësaj fushe, duhet ta dinë mirë. Nëse organet e drejtësisë, do të kenë një vendimmarrje, pas saj, mund të shqyrtohet një masë tjetër administrative për sekretaren mësimore të Fakultetit të Drejtësisë. /ShkodraWeb/
