Drejtori i Shtëpisë së të Moshuarve në Shkodër Fatjon Hoxha ka hedhur poshtë pretendimet e 81 vjeçarit Bardhok Gega i cili ka deklaruar se e kanë detyruar që të kapërcejë murin dhe të largohet gjatë muajit prill.
Drejtori Hoxha thotë se i moshuari është larguar në maj dhe jo në prill duke kapërcyer murin dhe se është rikthyer pas dy orësh dhe jo të nesërmen duke i izoluar brenda institucionit sipas rregullave. Për të gjitha këto drejtori Hoxha tregon dokumentet përkatëse.
Pas dy ditësh nga qëndrimi si i izoluar Bardhok Gega ka kërkuar leje për të shkuar tek një i afërm i tij dhe atje ka qëndruar për 10 ditë ndërsa kur është kthyer ka bërë tamponin dhe pasi ka dalë negative është lejuar që të futet sërish.
Në datën 1 korrik të këtij viti i moshuari Bardhok Gega përmes një deklarate të firmosur nga vetë ai ka kërkuar një largim të përhershëm nga shtëpia e të moshuarve në Shkodër duke e firmosur me dëshirën e tij.
Drejtori Hoxha sqaron edhe çështjen e 40% të pensionit duke thënë se nuk është e vërtetë që institucioni e ka mbajtur pasi disponon dokumentin që vërteton se e ka tërhequr atë pjesë të pensionit.
Të moshuarit në shtëpinë e të moshuarve në Shkodër vijojnë të jenë të izoluar që nga dita e parë e pandemisë dhe për arsye sigurie nuk lejohet që të dalin jashtë derisa ministria e shëndetësisë dhe mbrojtjes sociale të marrë një vendim tjetër.
Bardhok Gega nuk është një personazh i panjohur për mediat. Në ditët e para të tetorit 2018, pak pasi u përurua me bujë rikonstruksioni i Shtëpisë së të Moshuarve në Shkodër nga ministrja Manastirliu dhe deputeti Ditmir Bushati, Gega iu referua media si shembull që të moshuarit zgjedhin “përkujdesjen shtetërore” për pleqërinë.
Asokohe, Bardhok Gega tregonte se ishte dëshira e tij të qendronte në azil, edhe kundër vullnetit të tre djemve të tij që ishin në emigracion. Ai vetë ishte kthyer pas 12 viteve nga emigracioni pasi u sëmur. Mbeti i pastrehë në Tiranë, por zgjodhi Shtëpinë e të Moshuarve në Shkodër për të kaluar vitet e fundit të jetës. Ai madje deklaronte se minimalisht dy orë në ditë i bën jashtë institucion duke bërë ecje sepse e ndihmon për shëndetin dhe se azili pas rikonstruksionit ofronte kushte optimale.
Pyetja që mund të ngrihet tashmë, është e thjeshtë: Çfarë ka ndodhur nga tetori 2018 deri në maj 2020, kur 81 vjeçari Bardhok Gega u kthye nga personazh pozitiv në negativ… /ShkodraWeb Media/
