Është ndarë nga jeta ditën e sotme mjeku i njohur shkodran, Skender Rrjolli. Një nga mjekët që dhanë kontribute të jashtëzakonshme për të gjithë pacientët, doktor Rrjolli largohet nga kjo jetë në moshën 84 vjeçare.
Gazetarja Brunilda Dibra, pasi ka mësuar lajmin për ndarjen nga jeta të doktorit, përcjell një rast konkret, nga të shumtët që del në pah përkushtimi dhe humanizmi i Skender Rrjollit.
“Kur ditën e nisë nga spitalet (jo problem shëndetësor, por çështje recetash) dhe pret një orë autobuzin e nuk duket gjëkundi. Shkon në këmbë dhe sheh zjarrfikëse në oborr të spitalit dhe shumë rrëmujë. Kryen punë dhe merr rrugën prapë në këmbë për shpi dhe sheh një lajmërim. Doktor Skënder Rrjolli është larguar nga kjo jetë.
Dhe të përmbytin kujtimet… Në adoleshencë, viti 1997 ku babai hynte e dilte në sanatorium dhe doktor Skënderi e Fadili ishin shpresa dhe kurajoja ku kapeshim. Dy heronj në sytë e mi që dhe pse ngado kishte të shtëna, grabitje apo kaos, ish sanatoriumi (Drejtoria e Policisë sot) ishin në efiçensë të plotë, sa mundësi kishte asokohe dhe në shërbim 24/7.
Shkodra kaotike ku shërbimi urban është sa herë kanë dëshirë pronarët e autobusëve, është dhe qyteti i njerëzve të jashtëzakonshëm si doktor Skënderi që shërbeu pa kërkuar asgjë në këmbim, përveç mirënjohjes. Dhe atë e pat nga shumë zemra si unë, që dhe pas shumë vitesh, kam të fiksuar në memorie të qeshurën kumbuese kur babi im plotësonte fjalëkryqin para tij, ditëve të gjata të 97-tës në sanatorium…”, shkruan gazetarja shkodrane Brunilda Dibra në profilin e saj në Facebook.
Ndërkohë, në faqen e tij zyrtare në Facebook, Spitali Rajonal i Shkodrës shkruan:
“Të trishtuar për ndarjen nga jeta të Dr. Skender Rrjolli, një mjek i përkushtuar e njeri i rrallë, që i dedikoi jetën kujdesit për pacientët e Shërbimit të Pneumologjisë. Organizues dhe themelues i këtij shërbimi ku shërbeu për më shumë se 40 vite, Dr. Skenderi gëzoi respektin dhe mirënjohjen e shumë pacientëve për përkushtimin e jashtëzakonshëm që ai kishte në përkujdesjen ditë-natë për luftën ndaj TBC.”
ShkodraWeb i shpreh ngushëllime familjes, të afërmëve, miqve, kolegëve dhe të njohurve të doktor Skender Rrjolli.
