21 shkurti njihet si Dita Ndërkombëtare e Guidave Turistike. Një term relativisht i ri për vendin tonë, mësë shumti i përhapur pas vitit 1990, përshkruan një profesion, i cili nga viti në vit, po tërheq interesin e shumë personave, sidomos të rinjve.
Me hapjen e Shqipërisë, është rritur ndjeshëm numri i turistëve të huaj që vizitojnë bukuritë natyrore e njerëzore të vendit. Në këtë kuptim, roli i guidave turistike është esencial por edhe si një mundësi konkrete punësimi. Guida turistike është një profesion i njohur zyrtarisht, teksa ka edhe VKM që përcaktojnë kriteret për pajisjen me certifikatë për ushtrimin e e veprimtarisë së udhërrëfyesit turistik, detyrat, përgjegjësitë dhe kodin e etikës së tyre.
Pedagogu i “Luigj Gurakuqit” Ervis Krymbi, jo vetëm promovon këtë ditë, por edhe sjell në kujtesë se prej dy vitesh është hapur një kurs pranë Departamentit të Gjeografisë në Universitetin e Shkodrës.
“21 shkurti shënohet si Dita Ndërkombëtare e Guidave Turistike, me qëllim të ndërgjegjësimit të publikut se guidat turistike janë ambasadorët më të mirë të vendeve që promovojnë.
Një kurs në lidhje me guidat ka dy vite që është hapur tashmë pranë departamentit të Gjeografisë në UNISHK. Një vlerë e shtuar për kërkesat e tregut, duke ditur ofertën natyrore dhe kulturore që ka territori i Shqipërisë.”, shkruan pedagogu Krymbi.
Ky kurs, është një mundësi mjaft e mirë për të gjithë, sidomos për të rinjtë, të cilët përvrç kënaqësive shpirtërore që të jep pajisja me dije, njohja e vendlindjes dhe promovimi i saj, janë një mundësi reale edhe për të krijuar të ardhura përmes licensimit fillimisht dhe punësimit më pas.
