Mund të jesh i zhgënjyer, i mërzitur, i zhytur në halle e telashe të jetës. Por gjej kohë, merr një maskë me vete (sepse të duhet për të hyrë në qendrën e votimit), të duhet një pasaportë ose Letërnjoftim ID për të dhënë verdiktin tënd.
Vetëm diçka! Konsultohu edhe me ata që janë jashtë vendit, të afërmit e tu, që edhe sivjet ua hoqën të drejtën e votës. Konsultohu edhe me ata që disa ditë para zgjedhjeve, u thanë se po të hyni në vendlindje nga Greqia apo Maqedonia, para se të votoni, duhet të karantinoheni për dy javë.
Më pas voto, voto për vete por edhe për të dashurit tanë jashtë vendit, në emigracion. Nëse ky vend vazhdon të jetë i jetueshëm disi, është edhe merita e tyre.
E di se këto 30 vite nuk sollën atë që ëndërruam në 1990. E di se shumë kanë gati valixhet ose po mendojnë ti bëjnë gati. Por është momenti të mos e lëmë vendin në dorën e atyre që për 30 vjet e mjelën si një lopë që sot është kockë e lëkurë.
Unë besoj se jemi shumica e këtij vendi. Por edhe nëse jemi pakicë, s’ka gajle. Sepse ne po nisim të vendosim tullën e parë. Që pas 30 viteve, fëmijët e nipat tanë të mos shkruajnë apo të mendojnë të njëjtën gjë që po bëj unë sot, një ditë para 25 prillit.
Voto për kë të duash, me mendje apo me zemër. Nxirre edhe të pavlefshme votën nëse dëshiron, por mos ia lër dikujt tjetër të shprehet në emrin tënd. Sepse, edhe kur nuk ke votuar, në shumë raste ke rezultuar votues, sepse dikush të ka marrë të drejtën themelore, madje edhe ka firmosur për ty para 7 burrave e grave që kanë mbyllur sytë, edhe pse e kanë ditur se nuk je ti.
Harroje për pak minuta zhgënjimin, mllefin e 30 viteve akumuluar në fyt e në gjoks më keq se një virus. Kapërce edhe veten, voto për fëmijët që janë sot dhe ata që pas 30 viteve, do të kujtojnë 60 vjetorin e nisjes së demokracisë në këtë vend. E ke detyrë, e kemi detyrë të vendosim tullën e parë, edhe pse mbase nuk do ta shohim të përfunduar këtë mur. /Nga Blerti DELIJA, publikuar me 24 prill 2021, një ditë para zgjedhjeve parlamentare të atij viti/
