Një i ri shqiptar, ka përfunduar në mënyrën më të keqe të mundshme “aventurën” e tij si emigrant në Angli. I riu, i identifikuar me emrin Suad Sufaj, do të duhet të qëndrojë 12 vite në qeli. Më pas, sipas asaj që ka vendosur gjykata angleze, do të ekstradohet drejt Shqipërisë. 26 vjeçari është identifikuar me origjinë nga Shkodra. Historia e tij me drejtësinë angleze, nis me 26 shtator të vitit të kaluar. Sufaj u ndalua nga policia dhe pas një kontrolli të kryer, iu gjet në makinë ajo çfarë do ti kushtonte heqjen e lirisë për 12 vite. Jo vetëm kaq, kontrolli në banesën e tij, ka rezultuar fatal.
Kokaina ishte brenda makinës dhe nuk ishte fshehur. Pas kësaj, Policia shkoi në banesën e shkodranit, ku gjithashtu gjeti një sasi prej 8.5 kg kokainë, që përllogaritet se do të kapte një vlerë prej gati 800 mijë paund në treg.
Sufaj u shpall fajtor për trafikim kokaine dhe u dënua nga Gjykata Kingston me 12 vite heqje lirie. Hetuesit thanë para gjykatës se bëhej fjalë për një drogë të klasit të parë, sepse kishte një përqindje të lartë të pastërtisë. Policia Metropolitane deklaroi se bashkëpunimi me Agjencinë Kombëtare të Krimit kishte skuestruar kokainë, që në tregun e Britanisë së Madhe do të kapte një vlerë prej 1 milion paund, para të cilat do të fuqizonin akoma edhe më shumë krimin e organizuar.
Në përfundim të dënimit, i riu nga Shkodra, që është emigrant ilegal në Britaninë e Madhe, do të dëbohet për në Shqipëri. Mafia shqiptare raportohet se është kthyer në një shqetësim për Policinë britanike, pasi dominon një pjesë të mirë të shitjes së kokainës dhe kanabisit.
Sipas mediave lokale, grupet shqiptare, për shkak të lidhjeve të forta që kanë me trafikantët nga vendet e Amerikës Latine, kanë ulur çmimin e kokainës dhe kanë rritur cilësinë e saj, duke bërë që të rrisin dominimin e tyre në këtë treg.
