Ardjana Shaholli, 40-vjeçarja që vdiq pasi u vra nga bashkëshorti i saj është përcjellë për në banesën e fundit vetëm nga tre fëmijët e saj më të mëdhenj, djali 18-vjeçar dhe dy vajzat 15 e 14 vjeçe. Detajet e trishta të ceremonisë mortore në banesën e varfër në ish-kënetën e Durrësit vijnë përmes mediave.
Ajo ka mundur të kontaktojë nga afër me të afërmit e viktimës, të cilët konfirmojnë se tre fëmijët e tjerë të Ardjanës, më i vogli tetë vjeç ishin nisur në një kamp veror pushimi me një nga shoqatat që ndihmonte familjen nga Durrësi, të skeduar prej kohësh si familje me probleme të theksuara ekonomike e sociale.
“Lotët e dy vajzave nuk pushonin”, thonë dëshmitarët. E kishin të vështirë të shkëputeshin nga nëna e tyre që i kish rritur me mundime, ishte kujdesur që të shkonin në shkollë, pavarësisht se prej vitesh ishte përballur me dhunën e një burri xheloz që nuk e lejonte të shihte dritën e diellit.
Tani që djali i madh ishte rritur, Ardjana kish lënë pas krahëve frikën dhe kish marrë guximin të dilte në punë. Prej një muaji ishte punësuar në një lavanderi në qytetin e Durrësit, por kjo siç thonë të afërmit e ka përkeqësuar më shumë raportin me të shoqin.
Pavarësisht se e kish denoncuar disa herë, Çlirim Shaholli shoqërohej e lihej i lirë nga policia që të vazhdonte avazin e vjetër. “Ishte Ana ajo që ka bërë të pamundurën që familja të mbetej e bashkuar”,- thotë njëri prej të afërmëve.
Por pyetja dhe brenga më e madhe e gjithë të afërmve është fati i gjashtë fëmijëve të viktimës. “Ata edhe me nënë e babë ishin ku thërret qameti, po tani si do vetë halli i tyre”,- shprehen ata.
SI NDODHI NGJARJA
Çlirim Shaholli e çoi me duar e tija në urgjencë bashkëshorten e plagosur. Mjekët vunë re një hematomë në kokë, ndërsa gruaja nuk mundi të dilte e gjallë nga salla e operacionit. Pas shoqërimit në polici burri pranoi që ishin zënë. Ai e kishte shtyrë dhe ajo kish përplasur kokën në dysheme. “Nuk doja ta vrisja, si mund të lija jetim fëmijët e mi”,- mësohet të ketë thënë ai në polici.