Zbardhen detaje të tjera nga ngjarja tronditëse që ndodhi brenda një salle gjyqi në Gjykatën e Apelit në Tiranë ku gjyqtari Astrit Kalaja u ekzekutua me armë zjarri brenda sallës së gjyqit.
Raportohet se autori i identifikuar tashmë si shtetasi Elvis Shkambi ka pretenduar se ka qenë palë e dëmtuar në një çështje pronësie që ishte duke relatuar nga gjyqtari Astrit Kalaja, i cili ndërroi jetë vetëm disa çaste pas të shtënave, teksa ishte rrugës për në Spitalin e Traumës.
Mësohet se gjyqtari Kalaja ka qenë duke shqyrtuar një çështje që kishte të bënte me një rast pronësie në Qarkun e Shkodrës. Familja e Elvis Shkambit pretendonte pronësinë e ish-shkollës së Rezervave në kryeqendrën e Veriut, ndërsa palë kundërshtare ishin Rakip dhe Ervis Kurtaj.
Në një moment, teksa gjyqtari lexoi vendimin dhe Shkambi humbi gjyqin, agresori ka nxjerrë një armë zjarri, tip pistoletë, me të cilën ka qëlluar drejt gjyqtarit Kalaja.
Pasi ekzekutoi gjyqtarin me një plumb në zemër, Elvis Shkambi hapi zjarr edhe drejt palës kundërshtare në gjyq, duke lënë të plagosur Rakip dhe Ervis Kurtaj. Këta të fundit u dërguan me urgjencë për tek Spitali i Traumës ku mësohet se ndodhen jashtë rrezikut për jetën. Autori u arrestua në korridorin e Gjykatës së Apelit pa arritur të largohet.
