Mirë do të ishte që në kapërcyell të vitit 1990, zgjedhja të mos ishte mes ish- komunistëve që u zgjuan antikomunistë dhe komunistëve që e udhëheqën Shqipërinë nën diktaturë për 45 vite. Këtu duket se nisi apo vijoi morali i mallkuar që na ndjek pas ne shqiptarëve që kur nuk mbahet mend, zgjedhja e të keqes më të vogël.
Ish- komunistët, me apo pa skenar (nuk ka për tu marrë vesh kurrë) u bënë alternativë qeverisëse, tashmë 35 vjeçare e këtij vendi, në të gjitha anët e partive politike. Direkt apo indirekt, ata po qeverisin, tashmë me stafetë të kaluar nga bijtë tek nipat e me gjasë, edhe stërnipat e tyre. Të persekutuarit, të cilëve pa të drejtë sot u vendoset para “ish”, si të keqen më të vogël, nga 1990- a patën ish- komunistët që iu kundërvunë komunistëve nga ana tjetër.
Vetë, nuk ia dolën asnjëherë të organizohen, aq më pak të bëhen alternativë qeverisëse. Pinjollë të të persekutuarve, herë nga njëra anë e herë nga tjetra, më shumë realizuan përfitime personale se për kategorinë që morën poste në emër të tyre. E këto 35 vite, të rreshtuar shumicën e kohës gabim, thjesht dhe vetëm u përpoqën të zgjedhin “të keqen më të vogël”.
Edhe në konceptin politik, në mungesë të alternativave, shqiptarët e shkodranët në nivel lokal, janë detyruar të zgjedhin sërish të keqen më të vogël, atë apo ata që sjellin më pak dëme në jetën e tyre. Kështu ka ndodhur e me shumë mundësi, kështu do të vijojë. E nga viti në vit, postulati “askush nuk e ka seriozisht”, zë vend përherë e më shumë tek të gjithë.
Arsyeja? Sepse shqiptarët, asnjëherë nuk kanë patur mundësi të zgjedhin mes të mirës dhe të keqes, qoftë edhe e kamufluar e para. Po llogaritur se ne, të mirën apo të keqen, e kemi identifikuar me individin. “Ka vjedhur por hallall se diçka i la pas Shqipërisë apo Shkodrës”, është morali që ndan të keqen më të vogël si të preferuar në zgjedhje!
E sot, ata që me apo pa dëshirë kanë mbetur brenda kufijve të shtetit me emrin Shqipëri, masivisht janë të pakënaqur me atë që kanë perjetuar në më shumë se 35 vite rrugëtim, pa e vrarë shumë mendjen se e vetmja alternativë “zhvillimi”, ka qenë “e keqja më e vogël”. /ShkodraWeb/
