Dy reagime të forta, në një distancë vetëm 7 minutash, janë shpërfaqur në rrjetet sociale. Fillimisht Elisa Spiropali, më pas Erion Braçe, dy emra jo pak të rëndësishëm dhe me kontribute të rëndësishme në PS por edhe në epokën e Rilindjes, kanë përcjellë qëndrime pak a shumë, jashtë “gardhit” zyrtar të kësaj force politike që qeveris vendin nga 2013.
Edhe pse mund të jetë thjesht rastësi diferenca 7 minuta mes dy reagimeve, e vështirë të mos besohet se ka njëfarësoj koordinimi në distancë në qendrimet e të dyve. Ish- kryetarja e Kuvendit dhe ish- ministrja e jashtme Spiropali, ka bërë një shkrim të gjatë, duke u përpjekur të sqarojë zërat për përplasje të saj me kryeministrin Rama në mbledhjen e GPS.
“Ajo që po ndodh nuk është thjesht një çështje personale, por një shfaqje e një modeli që po zgjerohet me një normalitet të heshtur, ku arroganca dhe abuzimi nuk paraqiten më si devijime, por si forma të pranueshme shoqërore.”,
shprehet fillimisht Spiropali, duke e mbyllur me një fjali tjetër që lë shumë të kuptohet:
“Fitorja nuk merret, ajo provohet. Meritohet kur njerëzit nuk të ndjekin nga frika, por të besojnë nga bindja, dhe kur largohesh, mbetet respekti, jo vetëm rezultati.”.
Me gjasë, këto fjalë i drejtohen kryeministrit Rama, por mesa duket Spiropali do të flasë më vonë, më shumë sepse në këtë moment:
“Kur gjithçka kërkon zë, heshtja bëhet forma më e fortë e fjalës, sepse ajo nuk i nënshtrohet menjëhershmërisë, por i jep kohë të vërtetës të marrë formë.”.
Nga ana tjetër, ish- zëvendëskryeministri Erion Braçe, nga fjalët, siç ka vepruar Spiropali, ka kaluar tek deklaratat me zë e figurë duke u shprehur se kandidimin për bashkinë e Tiranës e ka seriozisht.
“Nderkohe, mes mesazheve pyetja me e perseritur eshte: e ke seriozisht apo po tallesh me njerezit? Atehere dy gjera: Nuk ka ndodhur kurre qe une te tallem me njerezit dhe nuk do te ndodhe ndonjehere me mua kjo. Pooo e kam seriozisht e do ti shkoj deri ne fund bashke me ju!”, thotë Braçe në mesazhin e tij.
Deklarata është kundërvënie e hapur ndaj kryeministrit Rama, i cili e ka thënë publikisht se “kurdo të votohet në Tiranë, kandidatja për Bashkinë e Tiranës është Ogerta Manastirliu”.
Për hir të realitetit, më shumë në grupe të ngushta dhe në tavolina kafenesh, edhe në Kuvend, “dora e hekurt” e kryeministrit Rama në administrimin e PS- së siç dhe të shtetit, komentohet prej vitesh por deri në muajt e parë të këtij mandati të katërt radhazi, askush nuk ka dalë kaq haptas si Spiropali e Braçe kundër tij.
Sigurisht është akoma shumë, shumë shpejt për të dalë në konkluzione përfundimtare. Sepse në çdo rast, ekziston mundësia e shuarjes së debateve e zërave, sidomos kur je në pushtet dhe ke “gurin e arrën në dorë”, siç i ka Rama dhe PS aktualisht. Por një pyetje mund edhe të guxohet të ngrihet: A po nis të “shthuret” gardhi i kryeministrit Rama në Partinë Socialiste me Spiropalin dhe Braçen? Përgjigja mund të vijë brenda më pak se një viti ose…mund të ketë sërish ndryshime në qeveri apo poste që i takojnë në këtë shtet mazhorancës aktuale! Edhe pa ta, ne Kuvend Rama vijon të ketë 85 mandate deputetësh, bashkë me PSD, kuptohet. /Nga Sokol N. SOKOLI/
