Kisha Katolike në Arqipeshkvinë Shkodër- Pult, është përfshirë nga një situatë e pazakontë në këto 34 vite të rihapjes së lirisë së besimit në Shqipëri me 11 nëntor 1990. Arqipeshkvi, imzot Angelo Massafra ka një “përplasje” publike me famullitarin dom Vlash Palaj. Shkak i dukshëm të paktën, mungesa e një pankartë- parrulle në qendër të Shkodrës që duhet të urojë festën e Krishlindjeve për besimtarët katolikë.
Në një mesazh në rrjetet sociale për Bashkinë Shkodër, mes të tjerave famullitari Palaj ka shkruajtur: ” E mirëpresim, që në një vend të dukshëm të qytetit të lexojshim një urim, fatkeqësisht të munguem deri më tâsh. Komunitetet fetare në qytet janë shumë të çmueshme. Jena në prag të Krishtlindjes, në prag të asaj feste që katolikët shqiptarë me shumë sakrifica e kanë festue edhe gjatë diktaturës, bile mund t’a kenë pague edhe shtrejtë, prandaj presim që Bashkia Shkodër, e cila nuk duhet me u identifiku me një person, apo edhe me disa, por si një ent i zgjedhun i pushtetit lokal, me i SHËRBYE komunitetit pjesë e të cilit âsht edhe ai katolik, të vendosë sa më parë në vendet e duhuna publike, pankartat me urimin: Gëzuar Krishtlindjen dhe Vitin e Ri 2025! Mirënjohja ka mbarësinë! Mosmirënjohja ndahet më turp!”.
Nuk ka vonuar dhe ka ardhur reagimi i Arqipeshkvit imzot Angelo Massafra, i cili ka shpërndarë një deklaratë zyrtare me vulë dhe me firmën e tij, të cilën mund ta lexoni të plotë më poshtë.
ARQIPESHKVIA METROPOLITANE SHKODËR – PULT
Prot. N. 194/2024
Shkodër, 17/12/2024DEKLARATË
Zoti Ju dhashtë Paqe.
Sapo u zgova në mëngjes, pas Meshës së Shenjtë, lexova në media që “Kisha Katolike” kishte kritikuar Bashkinë Shkodër dhe Kryetarin e saj për vonesën në vendosjen e parullës me mesazhin e urimit për festën e Krishtlindjes në qendër të qytetit.
Së pari ju bëj me dije se Kisha Katolike në Shkodër përfaqësohet nga Shkëlqësia e Tij Imzot Angelo Massafra dhe jo nga Dom Vlash Palaj, famullitari, i cili ka postuar statusin në media sociale, dhe nga asnjë Meshtar tjetër, pa autorizimin e Arqipeshkvit.
Për këtë arsye: Unë distancohem nga kjo mënyrë veprimi.
Së dyti ndjej një keqardhje të thellë për përdorimin e këtij statusi nga media dhe individë të ndryshëm, për qëllimet e tyre personale apo politike.
Fatkeqësisht përdorimi i këtij statusi nga mediat ka krijuar një atmosferë jo të përshtatshme në prag të festës së Krishtlindjes.
Shfrytëzoj rastin të falenderoj publikisht Bashkinë Shkodër për bashkëpunimin e veçantë për organizimin e Luminit të Martirëve të fesë Dom Gjon Gazulli dhe Atë Luigi Paliq.
Dëshiroj t’ju kujtoj gjithashtu, se në vitet e kaluara parullat me urimin për festat, janë prodhuar dhe vendosur nga vetë Komunitetet Fetare, me një leje të posaçme nga Bashkia. Propozoj që nga viti 2025 e në vazhdim të ndiqet e njëjta praktikë.
Të nderuar, lus dhe uroj që kjo deklaratë të shërbejë për të qetësuar situatën, dhe të vlerësojmë festën e Krishtlindjes për të qenë, siç thotë Papa Françesku “Artizanë të paqes”.
Zoti na bekoftë!
Angelo Massafra OFM
Arqipeshkëv Metropolit i Shkodër-Pult
