Departamenti Amerikan i Shtetit konfirmon në një reagim ekskluziv për Report TV se non grata ndaj Sali Berishës është pezulluar. Burime për Report Tv bëjnë me dije se nga ky vendim kanë përfituar po ashtu edhe dy shtetas bullgarë, për të cilët po ashtu është pezulluar sanksionimin zyrtar nga DASH sipas “Section 7031(c)”. DASH thotë se marrja e këtij vendimi i shërben interesit kombëtar të Shteteve të Bashkuara të Amerikës.
Gjithsesi, DASH nuk përmend në reagim nëse ky vendim prek edhe familjarët e ish-kryeministrit, të cilët po ashtu 5 vite më parë u futën në listën e zezë të SHBA. Por kreu i grupit të PD, Gazment Bardhi pretendon në një komunikim për Report Tv se non grata është pezulluar edhe për familjen e Berishës, bashkëshorten Lirie dhe dy fëmijët, Shkëlzeni me Argitën.
Reagimi i DASH për Report TV
Përshëndetje, Zyra e Shtypit e Departamentit të Shtetit.
Departamenti i Shtetit ka miratuar përjashtime (waivers) për disa nga shpalljet sipas nenit 7031(c), të vendosura nga administrata e mëparshme, pasi dhënia e këtyre përjashtimeve i shërben një interesi kombëtar bindës dhe të rëndësishëm të Shteteve të Bashkuara.
Me argumentet se është i korruptuar dhe minues i demokracisë, më 19 maj 2021, Shtetet e Bashkuara të Amerikës e shpallën Sali Berishën “non grata”, së bashku me familjen e tij të ngushtë, bashkëshorten dhe 2 fëmijët, Liri Berishës, Shkëlzen Berishës dhe Argita Berisha Malltezit. Vetë ish- Sekretari amerikan Blinken e cilësonte Berishës si të përfshirë në veprime korruptive dhe se ka përdorur pushtetin e tij për përfitimet e tij dhe për të pasuruar aleatët e tij politikë dhe anëtarët e familjes.
