“Bosi” i drogës që u arrestua pas 12 vitesh në kërkim nga Italia, gjykata e lë në burg

Gjykata e Durrësit ka vendosur pranimin e kërkesës së prokurorisë, për miratimin e arrestimit të përkohshëm, ndaj shtetasit Astrit Keçi, për qëllim ekstradimi për shkak të dënimit të dhënën në ngarkim të tij me vendimin penal të Gjykatës së Apelit Milano, me të cilin është dënuar me 30 vjet burg për kryerjen e veprës penale “Organizatë Kriminale me qëllim Trafikimi i lëndëve narkotikëve”.

Pasi u njoh me akuzën trupi gjykues në një seancë të zhvilluar me dyer të mbyllura caktoi masën “arrest me burg” me qëllim ekstradimi. Astrit Keçi u arrestua nga policia shqiptare për llogari të shtetit italian pasi ishte i shpallur në kërkim ndërkombëtar, ndërsa po ashtu në pranga ra edhe Shkëlqim Sufja, gjithashtu kërkim nga policia italiane prej vitit 2006, me akuzën për trafik droge.

Ata janë arretuar njëri në Durrës dhe njëri në Lezhë, ndërsa njiheshin si pjesë e bandës “Keçi” që operonte në Shijak. Keçi dhe Shkëlqim Sufja, prej vitesh fshiheshin në Shqipëri, por pas një hetimi të koordinuar me policinë e Triestes, Zyrën ndërlidhëse të Policisë shqiptare në Bari dhe Shërbimin Policor të bashkëpunimit Ndërkombëtar, u arrit të zbulohej vendndodhja e tyre.