Me datë 10 mars 2026, ShkodraWeb ka kërkuar zyrtarisht informacion lidhur me vijimësinë e procesit të zgjedhjes së administratorit të ri të Universitetit “Luigj Gurakuqi”. Sipas ligjit, kërkesa është bërë në rrugë elektronike me postën zyrtare të ShkodraWeb por edhe me Whatsapp zyrtar të ShkodraWeb. Kërkesa, duke ruajtur të dhënat sensitive individuale, mund të lexohet më poshtë.
Me 17 mars 2026, mbushet një javë nga kjo kerkesë krejt normale për informacion, drejtuar Bordit të Administrimit të kësaj IAL- je, që minimalisht ka detyrimin të përgjigjet, qoftë edhe thjeshtë për marrjen e kërkesës. Deri tani nuk ka ndodhur dhe me gjasë, nuk do të ndodhë përsa kohë, është planifikuar të mbledhja e ndërprerë me datë 3 mars 2026, do të nisë të martën në mesditë, ora 12:00.
Siç mund ta konstatoni më sipër, ShkodraWeb ka siguruar një mail të datës 12 mars 2026, ku kryetari i Bordit të Administrimit Adrian Leka, njofton 7 anëtarët e tij dhe sekretaren se mbledhja do të zhvillohet me datë 17 mars 2026. Më herët, në disa maile të siguruara nga ShkodraWeb, ishte krijuar ideja se mbledhja do të zhvillohej me 30 mars 2026, ora 10:00.
BORDI I ADMINISTRIMIT
1.Adrian Leka, kryetar
2.Genc Spahija, anëtar
3.Ema Kristo, anëtare
4.Ermira Repaj, anëtare
5.Kritian Preçetaj, anëtar
6.Entela Hoxhaj, anëtare
7.Brikene Dionizi, anëtare
Gjithë kjo amulli, për këtë procedurë, është vertetë e pakuptimtë. Minimalisht, nuk ka transparencën e duhur si proces, në finalen e tij, mbledhjen e Bordit të Administrimit që duhet të përzgjedhë mes 4 kandidaturave finale: Mark Molla, Kozeta Marku (Jana), Julian Pergega dhe Armando Vata. E gjithë kjo zvarritje por edhe mungesë transparence minimale, lë shije aspak të mirë. Duke qenë një organ i një institucioni publik siç është UNISHK, Bordi i Administrimit ka detyrim të informojë publikun, pse jo, edhe mbledhja e nesërme të jetë e hapur për mediat, përmes tyre, edhe për publikun.
Nuk duam të besojmë se Bordi i Administrimit, në kuptimin e 7 anëtarëve të tij, po përballet me ndonjë trysni apo ndikim në vendimmarrje. Do të ishte e dëmshme dhe sigurisht, aspak etike dhe institucionale nëse përzgjedhja e administratorit të ri të UNISHK, të kalonte në këto linja. Do të dëmtohej procesi, universiteti, imazhi i tij dhe sigurisht Shkodra dhe Veriu i vendit, i cili krenohet me këtë IAL, si i vetmi dhe më me eksperiencë pas atij të Tiranës. /ShkodraWeb/
