Bomberi kuqezi tek Vllaznia, ja cila është e verteta e “ardhjes” në Shkodër e Bekim Balës…

Ditët e fundit në rrjete sociale, po artikulohet përherë e më shpesh ideja e afrimit të komberit të Kombëtares shqiptare Bekim Balaj. Në shumë grupe e faqe të tifozëve të Vllaznisë, kalimi i Balajt tek Vllaznia në pjesën e mbetur të sezonit, quhet punë e mbaruar.

Po si qendron e verteta? Askush nuk e mohon se afrimi i një futbollisti me cilësitë e Bekim Balaj, do të ishte një plus i madh për Vllazninë, duke dhënë kontribut në një sektor që mesa duket nuk po ecën siç duhet, reparti i sulmit.


ShkodraWeb është interesuar pranë KF Vllaznia lidhur me këtë temë që po mbizotëron edhe merkaton e janarit për klubin kuqeblu. Konfirmohet se drejtuesit e klubit, kanë patur kontakte dhe komunikim me Balajn.

Është e natyrshme që një përforcim i tillë do të ishte i mirëpritur dhe sigurisht KF Vllaznia është vënë menjëherë në lëvizje për të mundësuar veshjen kuqeblu të sulmuesit të Kombëtares. Aq më shumë kur aktualisht Balaj nuk është i federuar me asnjë klub.

Mësohet se 31 vjeçari, tani për tani ka plane të tjera. Ai u ka thënë drejtuesve të KF Vllaznia se synon të vazhdojë karrierën jashtë Shqipërisë, duke parë mundësinë e federimit me ekipe nga të cilat edhe ka marrë oferta. Pra tani për tani, çeshtja “Balaj” konsiderohet e mbyllur për afrimin tek Vllaznia.

Madje, drejtues të klubit shkodran shprehen për ShkodraWeb se nuk e dinë se kush e ka bërë kaq “punë të kryer”, dukë dhënë edhe afate për zyrtarizimin e afrimit tek Vllaznia, në një kohë që konsiderohet “kapitull i mbyllur” të paktën për merkaton e janarit.

Sipas Transfermarkt, vlera aktuale e Bekim Balaj është 300 mijë euro dhe nga 16 janari 2022 është pa një klub. Ai ka si agjent Select Sports Management LLC, e njëjta që ka edhe shkodrani Sidrit Guri dhe sigurisht pret të sistemohet tek një ekip jashtë Shqipërisë.