Vllaznia është nisur drejt Austrisë për të zhvilluar fazën përgatitore ku në qendër të vëmendjes është përballja e Konferencë Ligë përballë rumunëve të Krajovës.
Trajneri i Vllaznisë Mirel Josa shprehet se është i kënaqur që kërkesa e tij për ta zhvilluar fazën përgatitore në Austri u plotësua por ky është momenti më i vështirë për një trajner sepse shumë prej planeve për ardhje lojtarësh në merkato mund edhe të mos realizohen.
Tekniku Josa kërkon që të ketë disa futbollistë që duhet të vijnë në merkato tek Vllaznia por duke ruajtur edhe ekuilibrat në skuadër sepse sipas tij ardhjet e tepërta mund të shkaktojnë probleme brenda ekipit.
Vllaznia gjatë fazë përgatitore në Austri do të zhvillojë të paktën 3 ndeshje miqësore në mënyrë që stafi teknik të ketë gati skuadrën për Konferencë Ligë por edhe sezonin e ardhshëm futbollistik.
INTERVISTA
“Ne jemi të kënaqur kur i kemi të gjitha gjërat në kohën dhe momentin e duhur. Është periudha më e vështirë për një trajner sepse duhet të vendosi shumë gjëra. Them se jemi në vijë të drejtë, tani do mundohemi për fazën përfundimtare, duke marrë parasysh kushtet që na ka krijuar klubi.
Jam shumë i kënaqur që do jemi në Austri. Vazhdojmë punën, shumë llafe janë fukarallëk. Duhet të ulim kokën poshtë sepse siç dihet në këto momente nuk dalin të gjitha gjërat si i parashikojmë. Ne idetë tona i kemi, urojmë të bëjmë sa më pak gabime.
Markun e kam dashur vetë. Kam pasur përshtypje të miat. Kemi dyndje në mesfushë dhe kush është në gjendje më të mirë do luajë. Kam kërkesa për të gjithë, duhet të rrisim agresivitetin që të kemi sukses.
Liridon Latifi? Nuk ka qenë në gjendje të mirë shëndetsore, kam komunikuar me të besoj këto 2-3 ditë do të vijë në Austri.
Mendoj që gjithsecili do lojtarë në skuadër, por ndonjëherë ardhjet e tepërta prishin ekuilibra. Më inmtereson shumë ekuilibri ekonomik, që të jetë skuadër e lidhur”, u shpreh Josa.