Situata në atë që quhet Partia Demokratike zyrtare, ishte temë e emisionit “Të Paekspozuarit” e gazetarit Ylli Rakipi në MCN TV. E ftuar ishte edhe ish- nënkryetarja e PD- së Grida Duma. Ajo ka përsëritur qendrimin e saj për largimin e Bashës përmes dorëheqjes nga drejtimi i PD- së.
Në artikulimin e saj, Duma ka përcjellë edhe një lajm që për herë të parë bëhet publik. Ajo ka zbuluar një detaj, lidhur me qendrimin e Grupit Parlamentar në mbledhjen e fundit me Bashën.
“Është diskutuar për një mundësi reflektimi. Një ose dy javë në pritje të dorëheqjes së Lulzim Bashës nga drejtimi i PD- së. Më pas do të jetë Grupi Parlamentar që ushtron kompetencat e tij”, ka thënë Duma.
Në përgjigje të pyetjeve, Duma ka lënë të kuptohet se maksimumi deri në fund të muajit mars do të ketë dorëheqje nga Basha ose do të përjashtohet apo pezullohet nga antarësia në Grupin Parlamentar të PD- së.
Grida Duma dha dorëheqjen nga posti politik si nënkryetare e PD- së pas humbjes së zgjedhjeve të 6 marsit 2022 në gjashtë bashki të vendit. Pas këtyre zgjedhjeve, pasti edhe dorëheqje të tjera por edhe pozicionime të deputetëve në favor të dorëheqjes së Bashës nga kreu i PD- së zyrtare.
