Buxheti i Vllaznisë për vitin 2019 do të jetë 97,6 milion lekë. Asambleja e KF Vllaznia sh.a. miratoi projekbuxhetin e paraqitur nga administratori Suad Lici me vetëm një votë kundër. Nga kjo shumë, Bashkia e Shkodrës si pronare do të financojë 56, 8 milion lekë ose 58% të totalit. Pjesa tjetër ose 42% e buxhetit merret përsipër të financohet nga të ardhurat e vetë klubit kuqeblu. Të ardhurat që krijohen nga vetë klubi pritet të vijnë nga e drejta televizive, reklamat, shitja e biletave, shitja e lojtarëve, fitimi i titullit kampion në Kategorinë e Parë dhe nga Akademia “Vllaznia”. Në fjalën e tij para Asamblesë, administratori Suad Lici theksoi se këtë sezon futbollistik Vllaznia do të synojë futjen në Kupat e Europës, përveç të tjerave, me ndikim të drejtëpërdrejtë në shëndoshjen e financave të klubit, sidomos në borxhet e akumuluara në vite nga Shoqëria Aksionare.
