Është ndarë nga jeta shkrimtari dhe poeti i njohur Nikolla Spathari. Lajmi i trishtë është dhënë nga të afërmit përmes rrjeteve sociale. Nikolla Spathari ishte ndër shkrimtarët e njohur të Shkodrës e Veriut, publicist, një aktivist letrar por edhe shoqëror.
Ai u lind në Malësi të Madhe, zhvilloi aktivitetin e tij në Shkodër ndërsa vitet e fundit u shpërngul me familjen në Durrës, ku edhe mbylli sytë. Nikolla Spathari do të përcillet në banesën e fundit, në varrezat katolike të Rrajit, ditën e hënë, ora 15.00, ndërsa pritja do të zhvillohet tek Kolping në Shkodër. ShkodraWeb i shpreh ngushëllime familjarëve, të afërmëve, miqve e kolegëve të Nikolla Spatharit.
Kush ishte Nikolla Spathari
Ka lindur në Malësi të Madhe me 5 dhjetor 1940, ku mbaroi edhe mësimet e para. Erdhi fare i vogël në qytetin e Shkodrës dhe bëri shkollën e mesme pedagogjike. Studimet e larta i kreu për matematikë – fizikë.
Ka botuar 15 libra, nga të cilat 7 libra me poezi për të rritur dhe për fëmijë. Merret me poezi, prozë, publicistikë, studime. Është nderuar me medaljen “Naim Frashëri” dhe me titullin “Mirënjohja“ e qytetit të Durrësit.
Ka marrë çmimet: “Mark Tuen“, “Migjeni“, “Dritëro Agolli“ dhe “Xha Deralla“. Është laureat i dy çmimeve të para dhe i një çmimi të dytë në poezi. Ka qenë kryeredaktor i gazetës “Besa” në Shkodër dhe i gazetës “Pena” në Durrës.
Gjithashtu ka qenë sekretar i Degës së Lidhjes së Shkrimtarëve dhe Artistëve në Shkodër dhe sekretar i Shoqatës “Atdhetare –Kulturore Kosova“. Aktualisht është kryetar i Klubit të Shkrimtarëve dhe Artistëve Durrës dhe drejtor i revistës “Vegime letrare”.
