Klorinda Preka, nga fshati Beltoje i Bashkisë Shkodër, një vit më parë zbuloi se ishte e prekur nga kanceri i gjirit. Mes lotësh, ajo tregon vështiresitë, për të luftuar këtë sëmundje, pasi gjatë gjithë kohës i duhet të jetë e kujdesshme qoftë në lëvizje ashtu edhe në ushqimet që konsumon.
“Para një viti e gjysmë sëmundjen e kapa për një muaj. Më pas shkova bëra ekon, më pas bëra biopsinë dhe hyra në sallë të operimit. Kalova në kimioterapi rreze e të gjitha me radhë”, tregon Klorinda.
Megjithatë 54 vjeçarja, ka gjetur forcë për të mposhtur sëmundjen vdekjeprurëse të kancerit, por ajo gjen forcë edhe për të sensibilizuar femrat e tjera të cilat mund të jenë viktima pa e kuptuar rrezikun që i kanoset.
“Unë ju bëj thirrje të gjitha grave që të shkojnë të bëjnë mamografinë, ekon dhe të drejtohen tek doktori”, thotë Klorinda.
Numri i femrave të prekura nga kanceri i gjirit ka pësuar rritje. Konstatimi vjen në muajin e sensibilizimit të kancerit, ku radiologia Valmira Gjoni apelon që gratë të kryejnë diagnostikimin e hershëm në mënyrë që kjo sëmundje të kapet në faza të para
“Kemi parasysh rritjen e kancerit të gjirit si sëmundje, e kemi vënë re në ekzaminimet e fundit. Ekzaminimi në kohë e parandalon këtë si sëmundje. Mosha kur një grua mund të bëjë mamografi është 40 vjeç e lart, moshat më të reja nuk janë për mamografi si fillim rekomandohet eko. Më pas diskutimet me mjekun specialist i tregojnë se çfarë lloj ekzaminimesh të tjera mund të bëjnë.”, shpjegon Gjonaj
Në Shkodër janë 2 mamografi të cilat u ofrohen pacientëve të rajonit verior, ndërsa deri në fund të muajit tetor ekzaminimet janë falas! Pavarësisht numrit në rritje të prekurve, ndërgjegjësimi edhe këtë vit ka qenë i ulët. Në të dy mamografite në Shkodër janë bërë rreth 450 ekzaminime, një numër i ulet në krahasim me numrin e popullsisë në nivel qarku! Gjatë këtij viti janë 20 raste të zbuluara rishtas me kancer gjiri në Shkodër. /rtsh.al/
Shënim: Disa imazhe gjenden nga interneti, që konsiderohen të jenë në domenin publik. Nëse dikush pretendon pronësinë, ne do të citojmë autorin, ose, sipas kërkesës, do të heqim menjëherë imazhin! Bashkohu me kanalin e SHKODRAWEB në Whatsapp, mjafton të klikoni Kontaktoni për lajmet më të fundit direkt në celularin tënd.
Ju mirëpresim!
