Çdo ditë e më shumë po shpërfaqet ai kandidati më i mundshëm i PS- së për të marrë bashkinë e Shkodrës me 14 maj 2023. Përveç daljeve të pandalshme publike në krah të Elisa Spiropalit, emri i tij po lakohet përherë e më shpesh në selinë rozë në Shkodër, në Tiranë por edhe në qarqe me ndikim jo të vogël në përcaktimin e emrit të kandidatit për bashkinë “mollë e ndaluar”, Shkodrën.
Nëse Benet Beci nuk do të kandidojë për PS- në me 14 maj, do të jetë zgjedhje e tij personale. Tashmë rreth emrit të tij, nëse bën një hap përpara, konsensusi është mjaft i gjërë. Tejkalon dukshëm jo vetëm PS- në, jo vetëm aleatët e dukshëm e të padukshëm politik por edhe një pjesë jo të vogël të asaj që konsiderohet “pjesa gri” e elektoratit në Shkodër. Mes tyre, edhe ata që kur kanë marrë pjesë në zgjedhje, kanë votuar vetëm djathtas.
Benet Beci nuk mund të konsiderohet i majtë “par exellence”. Përkundrazi, kanë qenë jo të paktë ata që edhe si kandidat për deputet në zgjedhjet e 25 prillit 2021, e kanë parë më shumë të djathtë se të majtë. Ky përceptim më shumë nga brenda të majtës se nga jashtë. Profili i një teknicieni, i krijuar e konsoliduar me qeveri të djathta e të majta, me raporte të afërta së dukshme e të padukshme me Berishën e Ramën, i kanë dhënë “imunitetin” e duhur.
Pavarësisht se nën zë, Beci konsiderohej nga disa segmente të opozitës si “simbol i korrupsionit” të qeverisjes 8 vjeçare Rama, askush nuk guxoi t’ ia artikulojë në zgjedhjet e 25 prillit 2021. Çuditërisht, pati një “pakt” mossulmimi, i cili edhe sot e kësaj dite, nuk është e qartë se ku e gjeti burimin dhe forcën të qendrojë në fuqi. Logjika më e thjeshtë, Beci ka njerëz me ndikim edhe në radhët e të djathtës, specifikisht, vetë PD- së.
Beneti mban një mbiemër të rëndësishëm në Shkodër, Beci. Falë lidhjeve farefisnore, krushqive, miqësive, mund të konsiderohet pse jo dinasti. Nuk bëhet fjalë vetëm për babain e tij, gjuhëtarin e mirënjohur Bahri Beci por për dhjetra, qindra të tjerë që kanë “shtruar rrugën” tashmë edhe për Benet Becin. Fjalën e fundit, mund dhe do ta thotë vetë Beneti…
Daljet e tij në krah të Spiropalit drejtuese politike e PS- së Shkodër, nuk mund të lexohen thjeshtë dhe vetëm ato të një deputeti të Shkodrës në mbështetje të partisë që i dha mandatin e deputetit. Më shumë lexohen si testim i vetë Becit i mbështetjes politike në qarkun e Shkodrës brenda PS- së. Sepse për bashkinë e Shkodrës, ashtu si për 4 të tjerat e qarkut, votat kryqëzohen e ndërthuren, premtohen e sigurohen edhe nga një njësi në tjetrën.
Veç kësaj, Benet Beci duket se është në një tjetër proces. Shpesh herë është thënë, madje edhe me 6 mars 2022, se “Edi Rama nuk e ka seriozisht me bashkinë e Shkodrës”. Në kuptimin se nuk “lufton” aq fort për Shkodrën sa për bashkitë e tjera kryesore. Mesa duket, Benet Beci pret të marrë indikacione të qarta nëse Edi rama, këtë rradhë, e ka seriozisht për bashkinë e Shkodrës apo jo!
E fundit, por jo nga rëndësia. Benet Beci është në pritje për vendimin final, të paktën deri në momentin kur zyrtarisht të shpallet kandidati i PD- së për bashkinë Shkodër. Pavarësisht se është e sigurtë se kush do të rikandidojë, Beci është në pritje edhe të situatës që do të krijohet tek PD Shkodër pas primareve të pritshme. Paralelisht, edhe të emrit që “PD”- ja tjetër, mund të hedhë në garë për Shkodrën.
Do të futet në garë apo jo për Shkodrën? Gjasat janë që po, por me rrethanat e mësipërme, do të duhet kohë për vendimmarrje. E cila deri tani, duket të jetë ekskluzivitet i Benet Becit. Askush, as Rama nuk duket se mund t’ i “japë urdhër” të kandidojë, duke lënë mandatin e deputetit. Këtë të fundit Beci mund ta dorëzojë vetëm kur të jetë i sigurtë që hapi tjetër pas kandidimit, është ulja në karrigen e kryebashkiakut të Shkodrës! /Nga Blerti DELIJA/
