Qeveria “Rama 3” është në kapërcyell të tre muajve të parë të mandatit apo “100 ditëve të para”. Ndoshta është momenti të analizohet vëmendja që është treguar nga shkodrës, fillimisht si bashki e më pas edhe si qark. “Ky duhet të jetë mandati i Shkodrës”, deklaruan përfaqësues të PS- së që kërkonin votën e shkodranëve me 25 prill 2021 në zgjedhjet politike. Ndërsa në ditët e fushatës elektorale, nga Shiroka dë to sillte në vemendje “nuk dua të justifikohem, por parapambetja e Shkodrës lidhet në radhë të parë me zgjedhjet që ka bërë Shkodra në vite. Ka zgjedhur gjithmonë të shkoj në një drejtim nga një kahje politike, por ku ka pasur gjithmonë polarizim, ekstremizim, dasi ekstreme dhe politika gjithmonë ka triumfuar mbi punën, fatet, jetët e njerëzve. Është zona me tensionin më të lartë të tifozllikut politik”.
Në takimin përmbyllës të fushatës, në krye të Pedonales dhe pak metra nga ndërtesa e Bashkisë, Edi Rama u përpoq të bindë shkodranët të votojnë PS- në, duke pranuar se”Për mua është shumë e qartë, unë nuk mendoj që PS ka bërë më të mirën në Shkodër, përkundrazi mendoj që PS s’ka dhënë këtu prova të mjaftueshme për të bindur shumëkënd që ndihet qytetar i Shkodrës dhe nuk është pjesë e atyre me qafën e trashë.”. Kjo deklaratë me 15 prill 2021, zgjoi shpresën se për Shkodrën, me mandatin e tretë radhazi, pasi për dy mandate nuk “vuni ujin në zjerm”, kryeministri Rama do të kthente sytë edhe nga kjo pjesë e vendit.
Në fakt, rezultati i 25 prillit 2021 nuk ishte inkurajues për Shkodrën. Qyteti e qarku “rebel” la PS- në me tre mandate. Madje, duke lënë jashtë Kuvendit edhe Ilir Beqajn, një nga njerëzit më të afërt e të vlerësuar nga Rama. “Vetëm me lulen simbol të PS- së fitonim 3 deputetë”, do të shprehej disa ditë më parë në një takim me strukturat socialiste të Shkodrës kryeministri i vendit.
Çfarë ka ndodhur këto 3 muaj të parë të mandatit të tretë të PS- së? Të gjitha takimet kanë qenë politike, në selinë e PS- së Shkodër e deri tek Fototeka “Marubi”. Janë artikuluar zyrtarisht e jo zyrtarisht vetëm “hallet” e PS- së, mënyrat e riorganizimit dhe në disa raste, për zgjedhje të mundshme të parakohëshme lokale. Është shprehur gatishmëria madje edhe optimizmi për garën e pritshme, edhe pse prej 30 vitesh PS nuk ka marrë asnjëherë pushtet. Rasti më i fundit 25 prill 2021 për të mos folur për “autogolin” e 30 qershor 2019.
Pak javë më parë, Kuvendi miratoi edhe buxhetin për vitin 2022. Lajmet më të bujshme nuk ishin investimet për Shkodrën por anulimi dy mjaft të rëndësishëm. Rruga e Komanit dhe rruga Milot- Shkodër, nuk përfituan financime dhe me shumë mundësi, nuk do të jenë as në buxhetin afatmesëm. Anulimi i këtyre dy projekteve lë shije mjaft të keqe, duke rikthyer ankthin e anashkalimit në vijimësi të Shkodrës nga qeverisja qendrore.
Shpresa e vetme, është miratimi i ndonjë projekti të vogël në kuadër të agjensive të ndryshme qeveritare, me fonde donatorësh të huaj. Edhe pse thuhet se vdes e fundit, shpresa mbetet e ftohtë sepse “moti i mirë shihet nade”. Kapërcyelli i tre muajve apo “100 ditëve të para”, nuk sjell asnjë zhvillim pozitiv për Shkodrën, në mandatin e tretë radhazi të kryeministrit Rama. Urimi më i mirë për Shkodrën në 2022- in është rifutja në hartën e Shqipërisë. Sa i përket investimeve të qeverisjes qendrore. /Nga Blerti DELIJA/
