Ambasadori i OSBE paralajmeron: Zbatoni reformen ne drejtesi, perndryshe ajo do te mbetet…

Reforma në Drejtësi vijon të tërheqë vëmendje ndërkombëtare, teksa korrupsioni dhe krimi janë ulur këmbëkryq në vendin tonë dhe “sundojnë” frikshëm çdo ditë. Deklarata të forta janë bërë sot dhe nga ambasadori i OSBE në Shqipëri, Robert Wilton, i cili tha se sistemi i drejtësisë duhet të drejtohet nga profesionistë që respektojnë vlerën e drejtësisë dhe jo çmimin e saj. Ambasadori Wilton foli për një sistem drejtësie të drejtë, transparent dhe efikas, duke i cilësuar këta elementë thelbësorë për vlerat e përbashkëta të 57 shteteve pjesëmarrëse të OSBE.

“Një gjyqësor i bazuar në profesionistë të drejtësisë që trajnohen dhe përzgjidhen siç duhet dhe që janë të gatshëm që, për atë integritet, të luftojnë çdo ditë të jetës së tyre profesionale. Pra, njerëz që respektojnë vlerën e drejtësisë, jo çmimin e drejtësisë”, tha Wilton.

Pas akuzave të forta të ambasadorit të SHBA, Donald Lu, i cili foli për bandat kriminale, që sipas tij, nuk arrestohen kurrë në vendin tonë, duke e  quajtur kështu drejtësinë të dështuar, edhe ambasadori i OSBE ka vënë alarmin se nëse Reforma në Drejtësi nuk zbatohet, ajo do të ngelet një gjurmë e vogël dhe e trishtë në historinë e Shqipërisë.

“Reforma ka potencialin ta transformojë vërtet këtë shoqëri, duke transformuar kështu edhe mundësitë e saj. Por, reforma është thjesht një deklarim i qëllimeve të mira; nëse nuk zbatohet, reforma do të ngelet një gjurmë e vogël dhe e trishtë në historinë e Shqipërisë”, shtoi më tej diplomati gjatë 20-vjetorit të Shkollës së Magjistraturës.