Një vit më parë, prindërit e 14-vjeçares së vrarë në vitin 1997, Bashkim dhe Xhevahire Bufi, fajësuan Policinë për ngjarjen, madje duke aluduar se pas asaj që ka ndodhur fshihen drejtues të lartë e për këtë arsye nuk kanë gjetur ende drejtësi.
Të ftuar në emisionin “Me zemër të hapur”, në “News 24”, vitin e kaluar, ata risollën në vëmendje ngjarjen e ndodhur më shumë se 20 vite më parë.
“Ne ishim në Pogradec atë ditë sepse punonim të dy, bashkë me burrin. Kur u kthyem e shkuam në shtëpi, pamë që kishte shumë njerëz. I thashë burrit që të shkonim në spital. Burri më tha që të mos shkonim, por zbritëm nga makina dhe u futëm brenda. Kur u futëm pamë që e kishin bërë vajzën gati. Ishin shumë policë aty, gra police, që unë i falënderoj sepse ma kishin veshur vajzën”, tregonte nëna e Matilës, Xhevahire Bufi. Ndërsa shprehej se ata vazhdojnë të jetojnë tek e njëjta shtëpi ku ndodhi ngjarja, madje edhe vajzën e kanë varrosur aty.
“Ne tani e dimë që ngjarja ka qenë aksidentale dhe këtë e pranojmë. Por në atë kohë askush nuk na vinte që të na tregonte se si kishte ndodhur ngjarja. Edhe sot unë nuk di asgjë me saktësi se si ka ndodhur. Ne nuk kemi kërkuar ndonjëherë autor, por kemi kërkuar që shteti të marrë përgjegjësinë dhe të bëhet drejtësi për vajzën tonë. Shefi i Krimeve të Rënda që ishte atje më tha se me kalimin e kohës mund të zbulojmë diçka, megjithatë nuk u zbulua asgjë. Pas kësaj ngjarjeje unë jam i bindur që fshihen drejtues të lartë”, shprehej babai i vajzës, Bashkim Bufi./panorama/
