Në Gjykatën e Posaçme u zhvillua seanca e radhës ndaj kreut të Bashkisë Vau i Dejës, Kristian Shkreli, ndaj të cilit SPAK i ka ngritur akuzën e korrupsionit aktiv në zgjedhje, i dyshuar se u bëri rrjet elektrik banorëve të zonës në këmbim të votës për PSD.
Ashtu sikurse në seancën e kaluar, Prokuroria e Posaçme edhe këtë të martë ka vijuar me pyetjen e dëshmitarëve të thirrur në këtë proces.
Dëshmitari Prek Kotaj: Unë punoj elektricist pranë OSHEE Shkodër. Në fshatin Stajkë është bërë një remont dhe kemi shkuar si grup, të cilin na e ka caktuar drejtori. Nuk e di në çfarë periudhe, por mbaj mend që kemi hequr disa kabuj të vjetër dhe vendosur të rinj. Nuk e njoh Kristian Shkrelin. As nuk jam përfshirë në asnjë zgjedhje.
Dëshmitari Anton Lumi: Punoj elektricist në zonën e Komanit pranë Vau i Dejës, prej gati 3 vitesh. Më ka thirrur shefi, kam shkuar në Stajkë për një remont. Ka qenë dy ditë atje. Kam ndihmuar grupin për kabujt. S’e mbaj mend periudhën se kur kam shkuar për të punuar në fshatin Stajkë.
Dëshmitari Klaudjo Fusha: Punoj me OSHEE Shkodër, elektricist. Jam në dijeni dhe kam punuar vetëm 1 ditë aty. Kohën fiks nuk e mbaj mend. Aty më ka çuar shefi i teknikës për të shtrirë një kabull. Kam punuar rreth 8 orë. Nuk e njoh Kristian Shkrelin dhe as nuk e kam takuar kurrë.
Dëshmitari Kastriot Gavoci: Unë punoj te shërbimet në Vau i Dejës me fadromë, prej rreth 8 vitesh. Unë tek linja nuk kam punuar, por tek rruga po. Punoj me mjet GPS ngjyrë të verdhë. Plani i punës është të dal në punë, të mos pi alkool gjatë punës. Atje janë rreth 3 mijë banorë. Tek ajo rrugë që po flitet për investime shkoja sepse ishte rrugë e keqe.
Seanca e radhës u caktua më 19 maj, ora 15:00, pasi prokurorisë i duhet kohë për prova shkresore.
SPAK nisi hetimin ndaj Kristjan Shkrelit më 20 mars, rreth një muaj para zgjedhjeve parlamentare të 11 majit 2025, pas një materiali të referuar nga Policia e Shtetit dhe një kallëzimi të një punonjësi të bashkisë, të cilat u bashkuan në një procedim të vetëm penal.
